SQO-da 170 mektep «Starlınk» spýtnıktik jelisi arqyly Internetke qosylady

Soltústik Qazaqstan oblysynda 170 mektep «Starlınk» spýtnıktik jelisi arqyly Internetke qosylady. Bul týraly atalǵan oblystyń ákimi Gaýez Nurmuhambetov aıtty, dep habarlaıdy Kazinform.

«3 jyl ishinde 160-tan aýyl ınternetke qosylyp, onyń sapasy jaqsartyldy. Búginde 275 myń turǵyny bar 539 eldi meken ártúrli tehnologııalar boıynsha Internetke qosylǵan. «Qoljetimdi ınternet» ulttyq jobasy sheńberinde 2024-2027 jyldary 304 aýyldy talshyqty-optıkalyq baılanys jelisine qosý josparlanýda», - dedi óńir ákimi Ortalyq kommýnıkatsııalar qyzmetindegi brıfıngte.

Onyń atap ótýinshe, Memleket basshysynyń aýyldaǵy bilim nysandaryn jyldam ınternetpen qamtamasyz etý tapsyrmasyn oryndaý maqsatynda oblys mektepteriniń 100 paıyzy Internet jelisine qosylǵan.

«Baılanys operatorlarymen birlesip jyldamdyqty arttyrý boıynsha jumystar júrgizilýde. Atap aıtqanda, 170 mektep «Starlınk» spýtnıktik jelisi arqyly Internetke qosylady», - dedi Gaýez Nurmuhambetov.