SQO-da 13 aýdan ortalyǵynyń tórteýinde ǵana kárizdik júıe bar

PETROPAVL. QazAqparat – Soltústik Qazaqstan oblysyndaǵy aýdan ortalyqtarynyń tórteýinde ǵana kárizdik júıe bar, onyń ózi ótken ǵasyrda salynǵandyqtan tozyǵy jetken, dep habarlaıdy QazAqparat tilshisi.

SQO qoǵamdyq keńesinde óńirdiń ekologııalyq máseleleri qozǵaldy. Sonyń biri – kárizdik júıe men tazartý qurylystarynyń eskirýi jáne aýdan ortalyqtarynda kárizdik tazartý qurylystarynyń bolmaýy. Qazirgi ýaqytta 13 aýdan ortalyǵynyń tórteýinde – Novoıshımka, ıAvlenka, Beskól jáne Saýmalkólde ǵana Keńes zamanynda salynǵan jáne búginde tozǵan kárizdik júıe bar. Al káriz tazartý qurylysy tek Saýmalkólde ǵana jumys istep tur.

«Petropavlda káriz aǵyndaryn tazartý máselesin sheshý maqsatynda 2005 jyldan bastap qazirgi ýaqytqa deıin «Qyzyljar sý» JShS káriz tazartý qurylystaryn tehnıkalyq qaıta jaraqtandyryp jatyr. Jumys aıaqtalmaǵan, bıologııalyq tazartýy joq.

Aıta ketý kerek, oblys ortalyǵynyń qoldanystaǵy káriz aǵyndaryn tazartý boıynsha tehnologııalyq syzbany jańǵyrtýdyń 4-shi kezeńi 2013 jyldan bastap júrgizilip keledi. Jobalaý-smetalyq qujattaryna birneshe ret túzetý engizildi, aıaqtalý merzimi ózgertildi», - deıdi SQO ekologııa departamentiniń basshysy Azamat Bektasov.

Petropavl qalasynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń málimetinshe, bul joba tek 2027 jyly ǵana aıaqtalyp, jumys isteı bastaıdy.

SQO-nyń ekologııalyq máselelerin sheshýge arnalǵan Jol kartasy aıasynda Ǵ.Músirepov atyndaǵy aýdannyń ortalyǵy Novoıshımkada káriz jelileri men tazartý qurylysyn salý josparlandy. Jobanyń quny 3 mlrd teńgeden asady. Kárizdik tazartý qurylysy salyndy, biraq nysan ázirge iske qosylǵan joq, qazirgi ýaqytta ınjenerlik jeli tartylyp jatyr.

Dál osyndaı joba Shal aqyn aýdanynyń Sergeevka qalasynda da júzege aspaq. Saraptamanyń oń qorytyndysyn alǵannan keıin ortalyq memlekettik organdarǵa jobany iske asyrýǵa qarajat bólý úshin bıýdjettik ótinim jiberilmek.