SQO-da 10 myńǵa jýyq adam revaktsınatsııadan ótti

PETROPAVL. QazAqparat – Soltústik Qazaqstan oblysynda koronavırýsqa qarsy ekpe alýy tıis turǵyndardyń 67,2 % vaktsınalaýdyń tolyq kýrsynan ótti, dep habarlaıdy QazAqparat tilshisi.

SQO Sanıtarııalyq-epıdemıologııalyq baqylaý departamentiniń basshysy Áset Jumataevtyń aıtýynsha, óńirde 265 701 adam koronavırýsqa qarsy vaktsınanyń birinshi komponentin saldyrdy. Bul josparly ekpe alýy tıis turǵyndardyń 71,6 %. 249 118 adam nemese 67,2 % vaktsınalaýdyń tolyq kýrsynan ótti.

Pfizer vaktsınasyn saldyrǵandar sany 4 560 adamǵa jetti. Ekpe alǵandardyń basym bóligin jasóspirimder quraıdy, 3 513 bala ata-anasynyń jazbasha ruqsatymen vaktsına qoıdyrdy. Sondaı-aq 928 emizýli balasy bar jáne 119 júkti áıel Pfizer saldyrdy.

«Koronavırýsqa qarsy revaktsınatsııa vaktsınalaýdyń tolyq kýrsynan keıin 6 aı ótisimen bir ret júrgiziledi. Qazirgi ýaqytta oblysta 9 871 adam revaktsınatsııadan ótti», - deıdi Áset Jumataev.