SQO ákiminiń bes orynbasarynyń ekeýi qysqartyldy
SQO ákimi baspasóz qyzmetiniń málimetinshe, Memleket basshysynyń tapsyrmasy boıynsha jáne Úkimet qaýlysyna sáıkes SQO ákimi orynbasarlarynyń eki shtattyq birligi qysqartyldy. Atap aıtsaq, Ǵanı Saqtaǵanuly Nyǵymetov jáne Tımýr Slamjanuly Sultanǵazıev qyzmetterinen bosatyldy. Qazirgi tańda oblys ákiminde 3 orynbasar bar.
Ǵanı Nyǵymetov 1983 jyly Aqtóbe oblysynda dúnıege kelgen. L. Gýmılev atyndaǵy Eýrazııa ulttyq ýnıversıtetin halyqaralyq qatynastar, AQSh-taǵy Montereı halyqaralyq zertteýler ınstıtýtyn memlekettik basqarý magıstri, sondaı-aq Nazarbaev Ýnıversıtetiniń Joǵary bıznes mektebin iskerlik ákimshilik magıstri mamandyqtary boıynsha bitirgen. Garvard ýnıversıtetiniń Kennedı atyndaǵy Basqarý mektebinde, Sıngapýrdyń Ulttyq ýnıversıtetinde basshylar úshin biliktilikti arttyrý kýrsynan ótti. «Bolashaq» baǵdarlamasynyń túlegi.
2020 jyldyń mamyrynan SQO ákiminiń orynbasary bolyp eńbek etti. Іshki saıasat, bilim berý, sport, mádenıet, din salalaryna jetekshilik etti.
Tımýr Sultanǵazıev 1982 jyly týǵan. Qazaq ulttyq medıtsına ýnıversıtetin jáne AQSh-taǵy Tıýleın ýnıversıtetin bitirgen.
SQO ákiminiń orynbasary bolyp 2021 jyldyń jeltoqsan aıynda taǵaıyndalǵan edi. Tımýr Slamjanuly oblystyń áleýmettik qorǵaý, densaýlyq saqtaý salalaryna jáne eńbek ınspektsııasyna jetekshilik etti.
Ákimniń eks-orynbasarlary basqa qandaı qyzmetke taǵaıyndalǵany ázirge aıtylǵan joq.
