SQO: 18 jastaǵy qyzdyń ólimine menıngıt sebep bolýy múmkin
Bıyl Kókshetaý qalasyndaǵy gýmanıtarlyq-tehnıkalyq kolledjge oqýǵa túsken Aıyrtaý aýdanyna qarasty Kırıllovka aýylynyń turǵyny 27 qyrkúıekke qaraǵan túni kóz jumdy. Boıjetken 1 kún buryn ózin nashar sezine bastaǵan. Alaıda 20 saǵattan keıin jan tásilim etti. Bastapqy boljaldy dıagnoz - «menıngokokk juqpasy». Dárigerler aýrýdy 5 kúnnen keıin ǵana rastaıdy nemese joqqa shyǵara alady.
«Qaza tapqan qyz 3 men 7 qyrkúıek aralyǵynda Kókshetaýda bolǵan. 10 qyrkúıekte Kırıllovkaǵa kelip, medıtsınalyq pýnktke shaǵymdanady. Tumaý tıgendikten emin alyp keri Kókshetaýǵa qaıtady.
24 qyrkúıekte qaıtadan Kırıllovkaǵa kelgen. Azdap tumaý tıip tursa da, medıtsınalyq kómekke júginbegen. Túngi saǵat 1-de ózin nashar sezinip, 26 qyrkúıek kúni tańǵy 11-de aýrýhanaǵa kelgen.
Baspasy aýyrǵan degen dıagnoz qoıyldy. Sodan keıin aýrýhananyń juqpaly aýrýlary bólimine jatqyzyldy. Artynan komaǵa túskendikten, jansaqtaý bólimine jiberildi. Denesinde bórtpe paıda bolǵan. Keshke jaqyn boıjetken kóz jumdy», - dedi Soltústik Qazaqstan oblysy boıynsha Qoǵamdyq densaýlyqty saqtaý departamenti basshysynyń mindetin atqarýshy Arman Kúshbasov.
Eske salaıyq, búgin, 27 qyrkúıekte, sanıtarlyq dárigerler Aqtóbedegi 5 jasar qyzǵa «menıngıt» dıagnozyn qoıǵan edi.
Sondaı-aq, menıngıtke shaldyqqan eki oqýshy Almaty oblysynyń Qarasaı aýdanyndaǵy juqpaly aýrýlary aýrýhanasynda tekseristen ótip jatyr.
