Sırııaǵa barǵan bitimger: Jergilikti halyqtyń bir-aq armany bar – tynyshtyq
ASTANA. KAZINFORM – Bir jyl buryn bir top (139 áskerı qyzmetshi) qazaqstandyq bitimger Sırııaǵa attandy. Olardyń arasynda tórt názik jan bar. Sonyń biri – Almaty qalasy bitimgerlik ortalyǵynyń sanıtar-nusqaýshysy Ardaq Kúrtebaeva. Bir jyl bitimgerlik mıssııasyn oryndap kelgen áskerı qyzmetshini áńgimege tartqan edik.
- Árıne, Sırııaǵa barar aldynda qorqynysh boldy, biraq men qaıda bara jatqanymdy bildim. Bitimgerlik mindetime, BUU jarǵysyna sáıkes, genderlik saıasat taqyrybynda sabaq ótkizý kirdi. Onyń ishinde zorlyq-zombylyq, áıelderdiń quqyǵyn qorǵaý máseleleri bar. BUU-nyń bitimgerlikke áıelderdi kóptep tartý týraly rezolıýtsııasy bar. Nege? Sebebi kelissóz kezinde er adamdarǵa qaraǵanda áıeldermen til tabysyp, kelisimge kelý ońaı. Sırııany alyp qarasaq, jergilikti áıelder men balalar, jalpy jergilikti turǵyndar áıelderge senim artady, - dedi Ardaq Kúrtebaeva agenttik tilshisimen áńgime barysynda.
Onyń aıtýynsha, qazaqstandyq bitimgerler Sırııaǵa barǵan kezde elde azamattyq soǵys bolyp jatty.
- Mıssııany oryndaýǵa attanýǵa men de, otbasym jaqyndarym da aldyn ala moraldyq turǵydan daıyn boldyq. Kúndelikti otbasy músheleri, jaqyndarymyzben uıaly baılanys arqyly habar alysyp turdyq. Mıssııa barysynda jergilikti turǵyndarmen jıi kezdesip turdyq, sonymen qatar biz ornalasqan bazada jergilikti áskerı qyzmetkerler boldy. Sırııa halqynyń bir-aq armany bar – tynyshtyq pen erkindik. Bul qazir olarǵa arman. Osy oraıda bizdiń elimizde erkindiktiń, bostandyqtyń, toqshylyqtyń baryna qatty qýanamyn, - deıdi ol.
Osylaısha jerlesimiz Otandy saǵynǵanyn, Otanǵa jetpeıtin álem joǵyn aıtyp otyr. Sóz sońynda Ardaq Kúrtebaeva aldaǵy ýaqytta taǵy da bitimgerlik mindet óteýge jiberse, daıyn ekendigin jetkizdi.
Eske sala keteıik, keshe qazaqstandyq bitimgerler Sırııadan elge oraldy.
Olar byltyr naýryzda Qazaqstannyń alǵashqy ulttyq bitimgerlik kontıngenti (139 áskerı qyzmetker) BUU mıssııasy aıasynda Golan jotalaryna jiberilgen edi.
Qazaqstandyq bitimgerler mobıldi patrýldeý, baqylaý beketterin kúsheıtý, evakýatsııa jáne mınasyzdandyrý jumystaryn oryndady.
Aıtar bolsaq, Sırııadaǵy tóńkeris kezinde qazaqstandyq bitimgerler BUU-nyń 24 qyzmetkerin evakýatsııalady.
Sonymen qatar qazaqstandyq bitimgerlerdiń Sırııada taǵy qandaı mindetti oryndap kelgeni týraly jazǵan bolatynbyz.