Sırııaǵa azamattardyń attanýynyń sebepterine mán berý kerek - Erlan Qarın
«Sondyqtan bul azamattar ne úshin ketip jatyr jáne olardy osyǵan qandaı faktorlar ıtermelep jatyr? Nege bul azamattar óz elderindegi ómirdi tastap, otbasylarymen basqa ári túsiniksiz, sondaı-aq bizge qajet emes qundylyqtar úshin qurbandyqqa salynýda? Árıne, bul elge ketip jatqan azamattar keıin Qazaqstanǵa oralǵanda qaýip tóndirýi yqtımal. Bul turǵyda Sırııaǵa ketip jatqan azamattardyń sebepterin anyqtaý kerek. Keıbiri sanaly túrde qarýly qaqtyǵysqa qatysý úshin barsa, keıbiri aldanyp túsip qalady, qalǵany basqa sebeptermen attanyp jatqandyǵy sóz bolýda», - dedi E. Qarın.
«Ókinishke qaraı, Sırııaǵa azamattar baryp jatqany ras. Biraq, bul taqyrypta jalǵan aqparattardy elep-eksheý kerek. Bireýler asyryp, eshqandaı naqty derekterge júginbesten Qazaqstannan 500 azamat bardy dep aıtýda. Bulaı esh dáıeksiz zertteý júrgizbeı, aqparatty taratý orynsyz», - dep toqtaldy sarapshy.
Saıasattanýshynyń sózine qaraǵanda, qazirgi ýaqytta shyn mánisinde Sırııada eshqandaı da azamattyq soǵys emes, ıaǵnı bir eldiń aýmaǵyn ár túrli qarýly toptar ózara bólip alyp, bir-birimen qaqtyǵysyp jatyr. «Atap aıtqanda, bul jerde úkimet áskeri men oppozıtsııalyq kúshter soǵysyp jatqan maıdan joq. Bul jaǵdaıdyń qalyptasýyna syrtqy kúshter áser etti, naqtyraq aıtqanda alyp memleketterdiń Sırııadaǵy ishki qaqatyǵysqa aralasýynan paıda boldy», - dedi E. Qarın.
Onyń paıymynsha, keıbir Batys jáne kórshiles elder Sırııadaǵy túrli qarýly radıkaldy toptarǵa qoldaý jasaýda.
«Basqa elderden, onyń ishinde TMD jáne Ortalyq Azııadan atalǵan memleketke baryp jatqan azamattar eń sońynda osy ár túrli toptardyń quramyna enip, shyn mánisinde ózara soǵysyp jatyr. Bul toptardyń arasyndaǵy qaqtyǵystyń negizgi sebebine toqtalatyn bolsaq, onda jaýlap alǵan eldi mekenderde baqylaý ornatý, qarjy kózine jáne soǵys kezinde ıelik etken oljany basyp qalýǵa baılanysty», - dedi saıasattanýshy.
