Sırııadaǵy jer silkinisinen zardap shekkender sany artty
Negizgi qıraý Aleppo, Latakııa, Hama, Tartýs provıntsııalarynda jáne Idlıb aımaǵynyń aýyldyq jerlerinde boldy.
«Barlyq memlekettik jáne jekemenshik medıtsınalyq mekemeler eskertýler men qońyraýlarǵa jaýap berýde, al medıtsına qyzmetkerleri qyzý jumys isteýde. Keıbir provıntsııalarda úzdiksiz áreket etý sharalary úılestirilip jatyr», - dedi Sırııanyń Densaýlyq saqtaý mınıstrliginen.
Zardap shekken aımaqtarǵa jedel járdem kólikteri men jyljymaly klınıkalar, sonyń ishinde Sırııalyq Arab Qyzyl Kresti jóneltilýde. Sırııanyń qan jáne medıtsınalyq ónerkásibi Bas uıymy barlyq azamattarǵa qan tapsyrý usynystary úshin alǵys aıtyp, qan bankterinde barlyq qan tobynyń jetkilikti mólsheri bar ekenin málimdedi.
«Aq kaskalylar» ataýymen belgili Sırııanyń azamattyq qorǵanysy úkimettik emes uıymynyń qutqarý toby Sırııanyń soltústik-batysynda 29 saǵattan astam aýyr jaǵdaıda izdeý-qutqarý jumystarynyń jalǵasyp jatqanyn, 790-nan astam adam qaza taýyp, 2200-den astamy jaraqat alǵanyn habarlady. Uıym óz brıgadalarynyń úlken kúsh salyp jatqanyn, biraq olar apattyń tolyq aýqymyna áli ataı almaı otyrǵanyn aıtady, óıtkeni júzdegen adam áli úıindiler astynda qalyp otyr.
Sırııada Adam quqyqtaryn baqylaý monıtorıng ortalyǵynyń (SOHR) málimetinshe, elde barlyǵy 1597 adam qaza tapqan.
Sırııa prezıdenti Bashar Asad Iran, Reseı, BAÁ, Oman, Aljır, Bahreın, Iordanııa, Qytaı, Belarýs, Palestına jáne Irak basshylarynan telefon qońyraýlary men Sırııaǵa kóńil aıtý jáne yntymaqtastyq jedelhattaryn aldy. Sonymen qatar, Lıvan, Kýveıt, Týnıs, Saýd Arabııasy jáne Vatıkan syndy aımaqtaǵy birqatar elder syrtqy ister mınıstrleri elge qoldaý bildirdi.
Arab memleketteri lıgasynyń Bas hatshysy Ahmed Abýl Geıt shyn júrekten kóńil aıtyp, álemdik qaýymdastyqty tabıǵı apattan zardap shekkenderge kómek kórsetýge shaqyrdy, dep habarlaıdy sırııalyq Al-Watan gazeti.
BAÁ prezıdenti Muhammad ben Zaıd Ál Nahaııan Sırııada dalalyq gospıtal ashýǵa jáne elge izdeý-qutqarý toby men gýmanıtarlyq kómek jiberýge buıryq berdi.
Reseı Sırııaǵa kınologter, qutqarýshylar jáne arnaıy tehnıkasy bar Tótenshe jaǵdaılar mınıstrliginiń 2 ushaǵyn jiberdi. Sonymen qatar, jer silkinisiniń saldaryn joıý jumystaryna Sırııadaǵy reseılik bir top ásker tartyldy. Bir kún buryn Sırııamen kórshiles Irak áýe kúshteriniń S130 ushaǵy Sırııaǵa azyq-túlik, dári-dármek jáne gýmanıtarlyq kómek jetkizgenin, al Irak Syrtqy ister mınıstrligi Sırııaǵa gýmanıtarlyq kómek jóneltý úshin áýe kópiri ashylǵanyn habarlady.
Seısenbi kúni tańerteń Aleppo áýejaıyna Aljır ushaqtary qondy. Sondaı-aq, Lıvan ınjenerlik polktiń 15 áskerı qyzmetkerin Sırııadaǵy izdeý-qutqarý jumystaryna qatysý úshin jiberetini habarlandy. Izraıl premer-mınıstri B.Netanıahý Izraılge dıplomatııalyq arnalar arqyly Sırııaǵa kómek kórsetý týraly ótinishter túskenin, kómek kórsetiletinin málimdedi, dep habarlaıdy The Times of Israel.
Osy arada, sırııalyq BAQ Sırııadan mundaı ótinish bolǵanyn joqqa shyǵardy. Memlekettik departamenttiń baspasóz hatshysy Ned Praıs dúısenbide AQSh-tyń Sırııaǵa kómekti úkimettik emes uıymdar arqyly, Sırııa prezıdenti Bashar Asadtyń úkimetimen ózara árekettespeı-aq jetkizetinin aıtty, dep habarlaıdy Al-Jazeera.
Foto: aa.com.tr
