Sırek kezdesetin metaldar óndirisin damytýǵa basymdyq beriledi – Oljas Bektenov

ASTANA. KAZINFORM – Paıdaly qazbalardy óndirý salasynda ınvestorlarǵa qolaıly jaǵdaı jasaý – Úkimettiń basym mindeti. Bul týrady GECA 2026 halyqarlyq geologııalyq forýmynyń jalpy otyrysynda Premer-mınıstr Oljas Bektenov aıtty.

– Salanyń aldynda turǵan basym baǵyttardyń biri – sırek kezdesetin metaldar óndirisin damytý. Elimiz jahandyq óndiris tizbeginde mańyzdy ról atqaratyn asa qajetti mıneraldardyń qomaqty qoryna ıe. Atap aıtsaq, ótken jyly tserıı, neodım, ıttrıı jáne basqa da sırek metaldardyń 800 myń tonnaǵa jýyq qory bar «Quıryqtykól» iri ken orny ashyldy. Bizdiń geologııalyq resýrstarymyz tehnogendik mıneraldyq túzilimderdiń esebinen de keńeıip keledi. Olardy ıgerý óndiris úshin jańa múmkindikter ashady, - dedi Oljas Bektenov.

Premer-mınıstr sý resýrstaryn basqarýdy da erekshe baǵyttardyń biri retinde atap ótti.

– Elimizdiń jerasty sýlarynyń barlyq ken oryndaryn túgendeý boıynsha aýqymdy jumysty bastadyq. Bul oraıda, tabıǵı baılyqty qorǵaý, taza aýa men sý qoryn saqtaý, qolda bar resýrstardy uqypty paıdalaný – bárimizdiń qasterli paryzymyz. Búgingi jáne keleshek urpaqtyń ál-aýqaty da tikeleı osyǵan baılanysty, - dedi ol.

Úkimet basshysy búgingi Forým geologııa úshin ǵana emes, ekonomıkanyń basqa salalary boıynsha da birlesken sheshimderdi ázirlep, seriktestik qatynastardy nyǵaıtý baǵytynda ózekti alań ekenin basa aıtty.

– Qazaqstan – mıneraldyq shıkizat resýrstaryna baı el. Paıdaly qazbalardy barlaý, óndirý jáne ony óńdeý salasynda ınvestorlar úshin qolaıly jaǵdaı jasaý – Úkimettiń basym mindeti bolyp qala bermek, - dedi Premer-mınıstr.

Aıta keteıik, keshe forýmnyń birinshi kúninde Energetıka vıtse-mınıstri Erlan Aqbarov elimizde geologııalyq barlaýǵa salynǵan ınvestıtsııa kólemi 433 mlrd teńgege jetkenin atap ótti.