Syr óńirinde turǵyn úı qurylysy qarqyndy damyp keledi
QYZYLORDA. KAZINFORM – Azamattardyń áleýmettik ıgiligi olardyń turǵyn úımen qamtylýyna tikeleı baılanysty bolǵandyqtan, halyqty baspanaly etý elimizdiń strategııalyq baǵyttarynyń biri retinde sanalady. Qyzylorda oblysynda Memleket basshysynyń tapsyrmasymen jáne Úkimettiń tikeleı qoldaýymen turǵyndardy baspanamen qamtamasyz etý jumystary tabysty júzege asyrylyp keledi.
Ekonomıkalyq ósim men halyqtyń turmys sapasyn jaqsartý úshin keshendi jumys qolǵa alynǵan. Sáýletti úıleri sap túzegen jańa shaǵyn aýdandar paıda bolyp, halyqtyń áleýmettik turǵydan osal toptary kezeń-kezeńimen baspana baqytyna kenelip jatyr.
Sońǵy tórt jylda (2021-2024) oblysta qarjylandyrýdyń barlyq kózi esebinen 2 mln 952 myń sharshy metr turǵyn úı paıdalanýǵa berildi. Kezekte turǵan azamattarǵa 6 myńnan astam páter (6726) tabystaldy. Barlyq aýdan ortalyqtarynda jańadan salynǵan 1500-ge jýyq páter el ıgiligine aınaldy. Bul arqyly myńdaǵan otbasy kópten kútken armanyna qol jetkizdi.
Osy jyly 3 600 páterlik turǵyn úıdiń qurylysyna bıýdjetten 48 mlrd 543 mln teńge qarjy bólindi. Onyń ishinde aýdandarda 322 páterlik 161 úı salynyp jatyr. Jalpy qarjylandyrýdyń barlyq kózinen jyl sońyna deıin 870 myń sharshy metr turǵyn úı beriledi dep josparlanǵan.
Qyzylorda qalasynyń ózinde sońǵy úsh jylda turǵyn úı qurylysy men páter satyp alýǵa 64 mlrd 97 mln teńge baǵyttalyp, 5 600 páterde turǵyndar qonys toıyn toılady.
Ótken aıda kezekte turǵan azamattarǵa 280 páterlik 7 turǵyn úıdiń, keshe taǵy da 320 páterlik 4 turǵyn úıdiń kilti tabystaldy. Bul – turǵyndardy baspanamen qamtýdaǵy eseli eńbektiń, aımaq ekonomıkasynyń ósý qarqynynyń jáne áleýmettik turaqtylyqtyń naqty kórinisi.
Búginde Qyzylorda qalasynda zamanaýı sáýlettik sheshimmen boı kótergen 7, 9 jáne 12 qabatty turǵyn úıler shahardyń jańa kelbetin aıshyqtap, qurylysqa serpin berdi.
