Sınoptıkter qarashanyń qara sýyǵyna qandaı boljam jasady
ASTANA.KAZINFORM — «Qazgıdromet» RMQ qarasha aıyna arnalǵan aýa raıy boljamyn jarııalady.
Sınoptıkterdiń boljamynsha, qarasha aıynyń birinshi aptasynda Qazaqstan aýmaǵynyń basym bóliginde turaqsyz aýa raıy soltústik tsıklonmen baılanysty bolady, jaýyn-shashyn jańbyrdyń sońy qarǵa ulasady, eldiń soltústik jartysynda, ortalyǵynda jáne shyǵysynda negizinen qar túrinde, burqasyn bolýy yqtımal.
Batys aımaǵynda jaýyn-shashyn aıdyń basynda túsedi. Dál osyndaı aýa raıy jaǵdaılary ekinshi jáne úshinshi onkúndiktiń jekelegen kúnderinde qaıtalanady.
Qarasha aıynda ekpindi jel, kóktaıǵaq jáne tuman jıi boljanady, al burqasyn kóbinese eldiń soltústik, ortalyq jáne shyǵys aımaqtarynda bolady dep boljanady.
Qarashanyń birinshi onkúndiginde respýblıkanyń batys aýmaǵynda aýa temperatýrasy túnde +2+7°S-tan -2-7°S-qa deıin, kúndiz +3+10°S-tan +10+18°S-qa deıin aýytqýy kútiledi, onkúndiktiń sońynda kúndiz +15+25°S-qa deıin jylynady.
Respýblıkanyń soltústiginde, ortalyǵynda jáne shyǵysynda onkúndiktiń ortasynda temperatýra túnde -7-15°S-qa deıin, kúndiz -2-10°S-qa deıin tómendeıdi, onkúndiktiń sońynda shyǵys óńirlerdi qospaǵanda, temperatýra álsiz oń mánderge deıin kóteriledi.
Eldiń ońtústigi men ońtústik-shyǵysynda aýa raıynyń ózgerýi boljanady, termometrlerdiń baǵanalary túnde 0,-5°S-qa deıin, taýly aımaqtarda -13°S-qa deıin, kúndiz 0,+8°S-qa deıin tómendeıdi, alaıda 07 qarashadan keıin +5+15°S-qa deıin aıtarlyqtaı jylynady.
Qarashanyń ekinshi onkúndiginde aýa temperatýrasynyń túnde 0,-5°S-tan -10-18°S-qa deıin, kúndiz 0,+5°S-tan 0,-8°S-qa deıin aýytqýy kútiledi. Úshinshi onkúndiktiń eń sýyq kezeńderinde aýa temperatýrasy túnde -15-20°S deıin, kúndiz -3-10°S deıin tómendeıdi.
Respýblıka aýmaǵynyń batys jartysynda, ońtústiginde jáne ońtústik-shyǵysynda ekinshi jáne úshinshi onkúndikte túngi ýaqytta aýa temperatýrasynyń -3-12°S-tan 0,+7°S-qa deıin, kúndiz +1+6°S-tan +8+18°S-qa deıin aýytqýy kútiledi. Eldiń ońtústik-shyǵysyndaǵy taýly aımaqtarda jekelegen kúnderi aıaz túnde -5-15°S-qa deıin, kúndiz -1-6°S-qa deıin kúsheıýi boljanady.
Jalpy, qarasha aıynda aýa temperatýrasy búkil el boıynsha normadan 1°S joǵary bolady dep kútilýde (normalar bıýlleten kestesinde keltirilgen).
Qarasha aıynda jaýyn-shashyn mólsheri Qazaqstan aýmaǵynyń basym bóliginde normaǵa jýyq, respýblıkanyń batysynda jáne soltústik-shyǵysynda — normadan kóp kútiledi (Soltústik Qazaqstan, Aqmola, Shyǵys Qazaqstan oblystarynda, sondaı-aq Batys Qazaqstan men Pavlodar oblystarynyń basym bóliginde, Atyraý men Mańǵystaý oblystarynyń batysynda, Qostanaı oblysynyń soltústik-shyǵysynda jáne Abaı oblysynyń shyǵysynda).
Eske sala keteıik, 4 qarashadan bastap -13 gradýs aıaz túsedi.