Sıngapýrde eki kúnde úsh adam ólim jazasyna kesildi

ASTANA. KAZINFORM — Ótken aptada Sıngapýr esirtkige baılanysty qylmysy úshin úsh adamdy ólim jazasyna kesti. Bul eldegi jyldyq kórsetkishti 17-ge jetkizdi. Bul 2003 jyldan bergi eń joǵary kórsetkish, dep habarlaıdy BBC.

EO delegatsııasy EO-ǵa múshe memleketterdiń, Norvegııanyń, Shveıtsarııanyń jáne Ulybrıtanııanyń dıplomatııalyq mıssııalarymen birge eki Sıngapýr azamaty men Malaızııa azamaty Samınatan Selvaradjýdyń ólim jazasyna kesilgenin aıyptady.

Konstıtýtsııalyq is júrgizýdi bastaǵan belsendiler tobynyń pikirinshe, esirtkige qatysty bap boıynsha mindetti túrde ólim jazasyn qoldaný adamnyń ómir súrý quqyǵy men zań aldynda teńdik quqyǵyn buzady.

— Sıngapýrdyń esirtkige qarsy óte qatań saıasaty álemde barǵan saıyn jalǵyz qalyp barady, — dedi jergilikti Transformative Justice Collective uıymy.

Olardyń aıtýynsha, Sıngapýr — esirtkige baılanysty qylmys úshin adamdardy ólim jazasyna kesýdi jalǵastyryp jatqan az elderdiń biri.

Alaıda, Sıngapýr úkimeti ólim jazasyn alyp tastaýdyń saldary aýyr bolatynyn alǵa tartady.

Sıngapýr bıligi esirtki saýdasyna taǵaıyndalatyn qatań jaza Ońtústik-Shyǵys Azııa elderindegideı kúrdeli esirtki qylmysyna tosqaýyl qoıady dep sanaıdy.

Esirtki saýdasy jergilikti zańnamada keńinen anyqtalǵan jáne satýdy, berýdi, tasymaldaýdy nemese paıdalanýdy qamtıdy. Sottar 15 gramnan astam geroın, 30 gramm kokaın, 250 gramm metamfetamın jáne 500 gramnan astam kannabıs saýdasy úshin ólim jazasyn taǵaıyndaýy kerek.

2023 jyly mınıstrlik tapsyrysymen júrgizilgen saýalnamaǵa sáıkes, Sıngapýrdyń eki myń azamaty men turaqty turǵynynyń shamamen 69%-y iri kólemde esirtki saýdasymen aınalysqandarǵa ólim jazasyn oryndy jaza dep sanaıdy.

Buǵan deıin Sıngapýrde er adam elge 52 gramm geroın ákelgeni úshin ólim jazasyna kesildi.

Vetnam óz kezeginde birqatar qylmys úshin ólim jazasyn alyp tastady.