Silk Way Star — Prezıdent Teleradıokesheni men CMG-diń jańa jobasy
ASTANA. KAZINFORM — Búgin Astanada QR Prezıdentiniń Teleradıokesheni men Qytaı Medıa korporatsııasy (CMG) «Silk Way Star» halyqaralyq jobasy týraly kelisimge qol qoıdy.
Qujat Qytaı Halyq Respýblıkasy Tóraǵasynyń Qazaqstan Respýblıkasyna resmı sapary aıasynda qabyldandy. Qol qoıý rásimi eki el basshysy Qasym-Jomart Toqaev pen QHR Tóraǵasy Sı Tszınpınniń qatysýymen ótti.
Kelisimge Prezıdent Teleradıokesheniniń dırektory Raýshan Qajybaeva men CMG Qytaı Medıa korporatsııasynyń basshysy Shen Haısıýn qol qoıdy.
«Silk Way Star» — Ortalyq Azııa elderi, Kavkaz jáne Qytaı ánshileri qatysatyn alǵashqy birlesken mýzykalyq joba. Joba aıasynda baıqaýlyq óner kórsetýler, shoý baǵdarlamalar men gala-kontsert josparlanǵan. Ár túrli tilde shyrqalatyn ánder men jarqyn kross-mádenı mýzykalyq kollaboratsııalar mádenıetter arasyndaǵy erekshe shyǵarmashylyq dıalogti qalyptastyrmaq. Aımaq elderiniń kórermenderi Silk Way jáne CGTN telearnalary arqyly jańa shoýdyń kórkem epızodtaryn tamashalaı alady.
— Búgin qol qoıylǵan Kelisim bizdiń medıa kompanııalar arasyndaǵy yntymaqtastyqtyń jańa kezeńin ashady. Qazaqstan men Qytaıdyń jetekshi eki medıakompanııasy alǵash ret álemdik deńgeıdegi jobany birlesip júzege asyrady, — dedi Prezıdent Teleradıokesheniniń dırektory Raýshan Qajybaeva.
Al CMG basshysy Shen Haısıýn jobanyń birlesip atqarylýy — eki kompanııa úshin de erekshe tájirıbe ekenin aıtty.
— Silk Way Star jobasynyń aýqymy Prezıdent Teleradıokesheni men Qytaı Medıa Korporatsııasy arasyndaǵy strategııalyq áriptestik deńgeıine saı keledi. Onyń birlesip atqarylýy — eki kompanııa úshin de erekshe tájirıbe, — dep atap ótti CMG basshysy Shen Haısıýn.
Sondaı-aq QR Prezıdenti Teleradıokesheni men Qytaı Medıa korporatsııasy BAQ salasyndaǵy birlesken jobalardy iske asyrý jónindegi Kelisimge qol qoıdy.
Eske sala keteıik, 2024–2025 jyldary QR Prezıdenti Teleradıokesheni men CMG birqatar birlesken jobany tabysty júzege asyrdy. Atap aıtqanda: «Astana–Beıjiń» telekópiri, «SCO — Build Strength Through Multilateral Dialogue» telekonferentsııasy, «SCO Connect» arnaıy shyǵarylymdary. Sondaı-aq qazaqstandyq jáne qytaılyq derekti fılmdermen turaqty túrde almasý jáne translıatsııalaý júzege asyrylyp keledi.
QR Prezıdentiniń teleradıokesheni — tolyq tsıkldy qazaqstandyq medıa-kompanııa, quramyna: Jibek Joly respýblıkalyq telearnasy, Silk Way jáne Silk Way Cinema halyqaralyq telearnalary, Kazinform HAA jáne Derekti fılmder ortalyǵy kiredi.
Qytaı medıakorporatsııasy (CMG) — álemdegi eń iri medıa konglomerattardyń biri. Oǵan Qytaıdyń ortalyq televızııasy (CCTV), Qytaıdyń halyqaralyq televızııa jelisi (CGTN), Qytaı ulttyq radıosy (CNR) jáne Qytaı halyqaralyq radıosy (CRI) kiredi. Korporatsııa quramynda barlyǵy 47 telearna, 17 radıostantsııa jáne 17 gazet bar.
Aıta keteıik, 2024 jyly Qytaı Halyq Respýblıkasynyń Tóraǵasy Sı Tszınpınniń Qazaqstan Respýblıkasyna memlekettik sapary aıasynda QR Prezıdentiniń Teleradıokesheni men Qytaı Medıa korporatsııasy (CMG) yntymaqtastyq jáne ózara túsinistik týraly memorandýmǵa qol qoıǵan bolatyn.