Silk Way Star 2025: Grand-fınaldyń jeńimpazy - Mıshel Djozef
ASTANA. KAZINFORM – Búgin Astanada «Silk Way Star» halyqaralyq jobasynyń grand-fınaly máresine jetip, jobanyń jeńimpazy Mıshel Djozef (Mońǵolııa) boldy.
Tóreshilerdiń baǵasy men kórermenderdiń daýys berý nátıjesi boıynsha da jeńimpaz birdeı anyqtaldy.
Jobanyń fınalynda Qazaqstan Prezıdenti Qasym-Jomart Toqaevtyń quttyqtaý sózin Qazaqstan Respýblıkasynyń Memlekettik keńesshisi Erlan Qarın oqyp berdi.
– Silk Way Star – Azııa elderiniń rýhanı yqpaldastyǵyn nyǵaıtyp, halyqtarymyzdyń dostyǵyn bekemdeı túsetin biregeı bastama. Silk Way Star – mádenı dıplomatııanyń aıqyn kórinisi, ulttarymyzdyń salt-dástúri men shyǵarmashylyǵyn pash etetin tamasha joba. Osyndaı aýqymdy is-sharalar yntymaǵymyzdy kúsheıtedi, ortaq qundylyqtarymyzdy jan-jaqty dáripteıdi, – dedi Erlan Qarın.
Sonymen qatar Qazaqstan Respýblıkasynyń Prezıdenti teleradıokesheniniń dırektory Raýshan Qajybaeva sóz sóılep, baıqaýdyń mańyzdylyǵyn atap ótti.
– Qadirli qonaqtar, qurmetti qatysýshylar! Silk Way Star baıqaýynyń grand-fınaly qutty bolsyn! Bıyl maýsym aıynda Qazaqstan Respýblıkasynyń Prezıdenti Qasym-Jomart Kemeluly Toqaev pen Qytaı Halyq Respýblıkasynyń Tóraǵasy Sı Tszınpın myrzanyń kezdesýi kezinde 12 memleket qatysatyn halyqaralyq mýzykalyq jobany bastaý týraly qujatqa qol qoıyldy.
Osy ıdeıanyń avtory Erlan Tynymbaıulyna jáne Jibek Joly arnasyna zor senim bildirgeni úshin shynaıy alǵysymdy aıtamyn. Sondaı-aq qytaılyq áriptesimiz China Media Group kompanııasyna jáne onyń jetekshisi Shen Haısıýn myrzaǵa jan-jaqty qoldaý kórsetkeni úshin kóp raqmet. Al endi… jobanyń eń mańyzdy kezeńi - Silk Way Star baıqaýynyń jeńimpazy kim dep oılaısyzdar? Ony álemniń jaryq juldyzy Dımash aıtsyn, – dedi Raýshan Qajybaeva.
Óz kezeginde álemge tanymal ánshi Dımash Qudaıbergen sahnada sóz sóılep, qatysýshylardy quttyqtady.
– Armysyzdar, asa qadirli kórermender! Búgin elimizde Silk Way Star sahnasynda 12 elden kelgen qatysýshylarǵa úlken qýanyshpen qosh keldińizder demekpin. Erekshe tolqyp turmyn. Qurmetti aǵaıyn, árbir qatysýshy osy joba aıasynda óz eliniń mádenıetin, rýhanııatyn, eń ádemi tustaryn, sazdy áýenin kúlli álemge joǵary deńgeıde kórsetti. Ruqsat bolsa, kóp sozbaı aq qoıaıyn, Silk Way Star jobasynyń jeńimpazy Mońǵolııalyq ónerpaz Mıshel Djozef, – dedi Dımash Qudaıbergen.
Sondaı-aq ol mońǵolııalyq ónerpazǵa baıqaý jeńimpazyna beriletin músindi tabystady.
Aıta keteıik, joba Qazaqstan Respýblıkasy Prezıdentiniń Teleradıo kesheni men Qytaıdyń China Media Group (CMG) medıakorporatsııasynyń kelisimi boıynsha uıymdastyrylǵan. Baıqaýda Ázerbaıjan, Armenııa, Grýzııa, Malaızııa, Qazaqstan, Qytaı, Qyrǵyzstan, Mońǵolııa, Tájikstan, Túrikmenstan, Ózbekstan jáne Ońtústik Koreıa syndy 12 elden qatysýshylar óner kórsetti.
Baıqaýdyń túsirilim jumystary 2025 jyldyń 20 tamyzynda bastalǵan, jalpy on epızod boldy.
Fınalda ALEM (Qazaqstan), ıAzmın Azız (Malaızııa), Avtandıl Abeslamıdze (Grýzııa), Mıshel Djozef (Mońǵolııa), Chjan He Sıýan (Qytaı), Saro Gevorgıan (Armenııa) jáne Madınaboný Ádilova (Ózbekstan) óner kórsetti.
Sonymen qatar jeńimpazdy anyqtaý úshin aralas daýys berý júıesi qoldanyldy qazylar alqasynyń baǵasy - 50 paıyz, onlaın-kórermen daýysy - 50 paıyz. Qazylar quramynda ánshiler, prodıýserler men medıasalanyń ókilderi boldy.
Aıta keteıik, Qytaı memlekettik birinshi sanatty. tanymal kompozıtor, mýzykalyq prodıýser, Silk Way Star halyqaralyq telejobasynyń tóreshisi Hýn Bın Kazinform tilshisine suhbat berip, joba týraly pikirimen bólisti.
Sonymen qatar Silk Way Star halyqaralyq telejobasynyń fınalyna oraı qazylar alqasynyń múshesi Erbolat Bedelhan pikir bildirgen edi.