Sı Tszınpın Qytaıdyń soltústigindegi kómir shahtasynda bolǵan apatqa dereý shara qabyldaýdy tapsyrdy
ASTANA. KAZINFORM — Qytaı tóraǵasy Sı Tszınpın juma kúni Qytaıdyń soltústigindegi Shansı provıntsııasyndaǵy kómir shahtasynda bolǵan gaz jarylysy oqıǵasynan keıin mańyzdy nusqaýlar berip, joǵalǵan adamdardy izdeý jáne qutqarý, sondaı-aq jaraqat alǵandarǵa kómek kórsetý úshin barlyq qajetti sharalardy qabyldaýǵa shaqyrdy, dep habarlaıdy Sınhýa aqparat agenttigi.
Qytaı Kommýnıstik partııasy Ortalyq Komıtetiniń bas hatshysy jáne Ortalyq áskerı keńes tóraǵasy bolǵan Sı Tszınpın apat saldaryn tıisti túrde joıý jáne onyń sebepterin muqııat tergeýdi, zańǵa sáıkes jaýapkershilikke tartýdy talap etti.
Juma kúni saǵat 19:29–da Chanchjı qalasynyń Tsınıýan ýezindegi Lıýshenıýı kómir shahtasynda gaz jarylysy boldy, saldarynan kóptegen adam qaza tapty. Senbi kúni tańǵy saǵat 6:00–degi jaǵdaı boıynsha segiz adam qaza taýyp, taǵy 38 adam jer astynda qalyp otyr.
Sı Tszınpın búkil el boıynsha jergilikti bılik organdary bul oqıǵadan sabaq alyp, ónerkásiptik qaýipsizdikke qatysty saqtyq tanytyp, iri apattardyń aldyn alý úshin yqtımal táýekelderdi anyqtaý jáne joıý boıynsha kúsh-jigerdi kúsheıtýi kerek ekenin atap ótti.
Sı Tszınpın sondaı-aq Qytaıda sý tasqyny maýsymy bastalýyna baılanysty tótenshe jaǵdaılarǵa daıyndyqty kúsheıtýge jáne ómir men múlikti qorǵaý úshin sý tasqynyn baqylaý jáne apattardy joıý boıynsha tıisti sharalar qabyldaýǵa shaqyrdy.
QHR Memlekettik keńesiniń premeri Lı Tsıan da apattyń sebebin anyqtaý úshin izdeý-qutqarý jumystaryn júrgizýdi tapsyrdy.
Eske sala keteıik, Qytaıda shahtadaǵy apattan qaza tapqandar sany 82 adamǵa jetti.
