ShYU elderi Azyq-túlik qaýipsizdigi baǵdarlamasyn talqylaýda

ASTANA. QazAqparat - Shanhaı yntymaqtastyq uıymyna múshe segiz eldiń úılestirýshileri 2018 jylǵy 9-10 maýsym aralyǵynda Tsındaoda ótken ShYU Sammıtiniń qorytyndysy boıynsha qol jetkizgen ýaǵdalastyqtardy iske asyrýdy bastady, dep habarlaıdy QazAqparat QR Syrtqy ister mınıstrligine silteme jasap.

«Ústimizdegi jylǵy tamyz aıynyń ortasynda Qyrǵyz Respýblıkasynyń tóraǵalyǵymen Ulttyq úılestirýshiler keńesiniń birinshi otyrysy ótedi jáne onyń sheńberinde taraptar azyq-túlik qaýipsizdigi boıynsha ShYU-ǵa múshe memleketterdiń yntymaqtastyq baǵdarlamasynyń jobasyn talqylaýdy josparlaýda», - dedi ShYU-nyń Qazaqstan tarapynan Ulttyq úılestirýshisi Erlan Álimbaev.

Onyń atap ótýinshe, azyq-túlik qaýipsizdigi salasyndaǵy yntymaqtastyq týraly bastamany 2014 jyly QR Prezıdenti Nursultan Nazarbaev usynyp, 2018 jyldyń basynda egjeı-tegjeıli konsýltatsııalar qorytyndysy boıynsha ShYU-ǵa múshe memleketterdiń qoldaýyna ıe boldy.

 «Bul bastamanyń iske asýy azyq-túlik óndirýshi elderdiń ekonomıkasymen tutynýshy arasyndaǵy úılesimdi ózara baılanysty qamtamasyz etedi. Baǵalar dınamıkasyna, mıllıondaǵan adamdardyń azyq-túlikke qol jetkizýine oń áser etedi jáne jalpy ShYU keńistiginiń turaqty damýyna áserin tıgizedi», - dep málimdedi dıplomat.

Tsındao qalasynda ótken ShYU Sammıtinde bul qujatty odan ári pysyqtaý jáne aldaǵy ShYU Úkimet basshylary keńesinde qabyldaý boıynsha ShYU-ǵa múshe memleketter Basshylary keńesiniń Sheshimi qabyldanǵan bolatyn. Ulttyq úılestirýshi túsindirgendeı, baǵdarlama aýyl sharýashylyq pen óńdeý óndiristerin qarjylandyrý tetikterin, ónimdi sertıfıkattaý jáne ShYU keńistiginiń ishinde eksport-ımportqa qolǵabys kórsetý máselelerin sheshýdi qamtıdy.