Shymkenttik jastar «Aýtızmdi jeńemiz» atty aktsııa uıymdastyrdy

ShYMKENT. QazAqparat  -  Shymkenttik jastar «Aýtızmdi jeńemiz» atty aktsııa uıymdastyrdy. «Jastar resýrstyq ortalyǵynyń» bastamasymen ótken sharada  eriktiler kópshilikke  aýtızm týraly aqparat taratyp, arnaıy rolıkter kórsetti, dep habarlaıdy  QazAqparat tilshisi.

Aktsııany  uıymdastyrýshy eriktilerdiń sózinshe, qazir elimizdiń keıbir aımaqtarynda aýtızmi bar balalarǵa arnalǵan ortalyqtar joqtyń qasy. Sondyqtan atalǵan dertpen kúresý úshin ata-analar búldirshinderin shet elderge aparýǵa májbúr. Onyń ústine  bul syrqat sońǵy kezde balalar arasynda  beleń alyp barady. Sondyqtan jastar osy máselege jurttyń nazaryn aýdartsaq deıdi. Óıtkeni aýtızmmen aýyratyn jetkinshekterge qoǵamǵa beıimdelip, áleýmettenip ketýi qıynǵa soǵady.

Aktsııa barysynda jastar  shahar turǵyndaryna  aqparat paraqshalaryn taratyp,  halyqqa aýtızmmen aýyratyn adamdarmen qalaı sóılesý qajettigin sóz etti. Ortalyq alańda  «Aýtızmdi jeńemiz!» dep urandatyp, aspanǵa kógildir tústi sharlardy ushyrdy. Bul aýtıstıkalyq spektrdegi aýytqýlary bar naýqastarǵa degen qoǵamdyq qoldaýdyń belgisi bolyp sanalady.

Aıta keteıik, búgingi tańda óńirde aýtızmi bar 123 bala esepte tur. Onyń 23-i  mektep jasyndaǵy jasóspirim bolsa, 29 bala ońaltý ortalyǵynda em qabyldaýda.