Shymkenttik órt sóndirýshiler maıdangerdiń qora-qopsysyn jańalap berdi

ShYMKENT. QazAqparat  - Shymkent qalasyndaǵy №1 órt sóndirý bóliminiń qyzmetkerleri Jeńis kúni qarsańynda azamattyq qorǵaý organdaryndaǵy Ekinshi dúnıejúzilik  soǵystyń sońǵy ardageri Vasılıı Mýhachevtyń úıine baryp, sharýalaryna kómektesti, dep habarlaıdy  QazAqparat tilshisi.

Órt sóndirýshiler maıdangerdiń saraıynyń shatyryn jóndep, jańasyna  aýystyryp berdi. Sondaı-aq, qoranyń  ishki jaǵyndaǵy aǵash bórenelerdi jańartty. Osylaısha órt sóndirýshiler men qutqarýshylar ony mereke qarsańynda qýantyp qoıdy.

Aıta keteıik, soǵys ardageri  bıyl 96 jasqa tolǵanyna qaramastan ózin tik ustaıdy, erekshe kóterińki kóńil kúıde júredi. Taıaq súıense de, túrli is-sharalarǵa qatysyp turady. Jeńis kúnine oraı kelgen órt sóndirýshilerdi ol qýana qarsy alyp, sonaý surapyl kúnderindegi óz estelikterimen bólisti. Bir qyzyǵy, el aǵasy urys jyldarynda basynan ótkergenderin esine jaqsy saqtaǵan.
 

«Tańqalarlyǵy, aı nemese jyl buryn bolǵandy umytyp qalýym múmkin, biraq soǵys jyldary esimde. Stalıngradty azat etý urysyna qatysyp, Máskeý túbindegi shaıqasta da nemis áskerimen betpe-bet keldim. Men úshin Ekinshi dúnıejúzilik soǵysy 6 jylǵa sozylyp, 1946 jyldyń jeltoqsan aıynda ǵana elge oraldym. Kelgen boıda Shymkent qalasynda órtke qarsy qyzmette jumys istedim. Maıor shenine deıin kóterilip, zeınetke shyqtym. Bir qyz, eki ul tárbıelep ósirdim, qazir nemerem bar. Barlyǵyna sanaly tárbıe men bilim berip, azamat qataryna qostym»,- deıdi Vasılıı Mýhachev aqsaqal.