Shymkenttegi túrmelerge jappaı beınebaqylaý ornatylady

ShYMKENT. QazAqparat – Shymkenttegi túrmelerge jappaı beınebaqylaý ornatylady. Bul týraly qylmystyq atqarý júıesi komıteti tóraǵasynyń birinshi orynbasary Saǵat Madıevtiń jumys sapary barysynda málim boldy, dep habarlaıdy QazAqparat tilshisi.

Shymkent qalasy men Túrkistan oblysynyń aýmaǵynda penıtentsıarlyq mekemelerdiń jumys barysymen tanysqan Saǵat Madıev eńbekke qabiletti sottalǵandarǵa jumys oryndaryn usyný mańyzdy másele ekendigin alǵa tartty. Sottalǵandarǵa jumys oryndaryn usyný úshin qylmystyq atqarý júıesine qarasty mekemelerge kásipkerlik sýbektilerin tartý kerektigin aıtty.

Sondaı-aq, jappaı beınebaqylaý júıesin ornatý qajettigin tapsyryp, sottalǵandardyń quqyqtaryn múltiksiz saqtaý boıynsha atqarylýy tıis birqatar tapsyrma júktedi.

Saǵat Madıev Qazaqstandaǵy áıelder úshin qaýipsizdigi barynsha joǵary jalǵyz mekemede jazasyn ótep jatqan áıelderdi jeke qabyldap, máselelerimen tanysty.

Aıta keteıik, búginde Shymkent qalasy men Túrkistan oblysynyń aýmaǵynda ártúrli mazmundaǵy 6 penıtentsıarlyq mekeme jumys isteıdi. Olardyń beseýi qala aýmaǵynda bolsa, bireýi Túrkistan oblysynda ornalasqan.