Shymkentte kásipkerlerden para alǵan 12 kedenshi sottaldy
Taǵy bir keden beketiniń qyzmetkeri qylmysynyń dálelenbeýine baılanysty aqtalyp shyqty. Qylmystyq isti qaraý barysynda sottalýshylardyń 2017-2018 jyldar aralyǵynda «Qazyǵurt», «Qaplanbek» jáne «Saryaǵash stantsııasy» keden beketterinde kásipkerlerden júıeli túrde para alyp kelgeni anyqtalǵan. Olar beketterden ótetin júkterdiń qojaıyndarynan kedergisiz ótkizý úshin paranyń mólsherlemesin ár túrli kólemde belgilegen. Máselen, kókónister, jemister jáne keptirilgen jemisterdi ımporttaý úshin bir vagon nemese bir avtokólikke 300-den 800 AQSh dollaryna deıin alyp otyrǵan. Al, Reseı Federatsııasynan Ózbekstan Respýblıkasyna aǵash materıaldarynyń tranzıti úshin 10 myń teńgeden 200 AQSh dollaryna deıin, halyq tutynatyn taýarlardy eksportqa shyǵarý úshin 10 myń teńgeden 50 000 teńgege deıin suraǵan. Jedel izdestirý is sharalary nátıjesinde olardyń bir ǵana kásipkerden 13 myńnan 34 myń AQSh dollaryna deıin aqsha alǵany anyqtalǵan.
«Olar ózderiniń talaptaryn aıtady. Ony bermese kedergi jasaımyz dep eskertken. Máselen, «Qaplanbek» keden beketi boıynsha boıynsha para sommasy 29 mln teńgeny qurasa, «Qazyuǵrt» keden beketi boıynsha 20 mln 528 myń 680 teńge bolǵan. Al «Saryaǵash» stansasy boıynsha 2 mln 922 myń teńge kóleminde para alǵany dáleldengen»,-deıdi Shymkent qalalyq qylmystyq ister jónindegi mamandandyrylǵan aýdanaralyq sotynyń sýdıasy Ábınur Qarabaev.
Sot úkimimen burynǵy Ońtústik Qazaqstan oblystyq Memlekettik kiris departamenti bastyǵynyń orynbasary men «Qaplanbek» keden beketiniń basshysy 10 jylǵa bas bostandyǵynan aıyryldy. Taǵy úsh kedenshi 4 jylǵa, alty aıyptalýshy 7 jyldan jaza arqalady. Ózge aıyptalýshylar jazasynyń óteý merzimine baılanysty sot zalynan bosatyldy. Barlyq sottalýshylarǵa jazalaryn qaýipsizdigi barynsha tómen mekemesinde óteý belgilendi. Sonymen qatar, barlyq sottalǵandar ómir boıy memlekettik organdarda, kásiporyndarda jáne kvazımemlekettik sektor sýbektilerinde laýazymdy atqarýǵa tyıym salynǵan.
«Sotta sottalýshylar N.Tenlıbaev, E.Baısaparov, A.Djýmabaev óz kinásin moıyndamady. Al, A.Djýmabaev sotqa deıingi tergep-tekserý barysynda óz kinásin tolyq moıyndap, taǵy basqa qylmyskerlerdi áshkereleýge kómegin kórsetti. Qalǵan sottalýshylar óz kinásin moıyndady. Oǵan qosa, sot, sotqa deıingi tergep-tekserý amaldary barysynda jiberilgen zań buzýshylyqtary boıynsha, Sybaılas jemqorlyqqa qarsy is-qımyl ulttyq Bıýrosyna jáne Shymkent qalasynyń prokýroryna jeke qaýly shyǵardy»,- deıdi sýdıa Ábınur Qarabaev.
Aıta keteıik, aıyptalýshylar 2018 jyldyń aqpan aıynda elimizdiń ońtústiginde júrgizilgen aýqymdy operatsııa kezinde ustalǵan bolatyn. Olarǵa qazaq-ózbek memlekettik shekarasyndaǵy «Saryaǵash», «Qazyǵurt», «Qaplanbek» keden beketteriniń qyzmetkerlerine ekonomıkalyq kontrabanda, uıymdasqan top, qylmystyq uıym men transulttyq uıymdasqan top qurý jáne olarǵa basshylyq etý, sol sııaqty olarǵa qatysý jáne paraqorlyq faktileri boıynsha sotqa deıingi tergep-tekserý júrgizilgen. Qylmystyq is 180 tomǵa jınaqtalyp, sot otyrysy segiz aıdan asa ýaqytqa sozyldy.
