Shymkentte ınternet alaıaqtyqqa qatysy bar kúdiktiden 6 telefon men 20 SIM karta tárkilendi

ShYMKENT. QazAqparat – Shymkentte ınternet alaıaqtyqqa qatysy bar 5 kúdikti anyqtalǵan. Olardyń ekeýi Reseı Federatsııasynda ustalyp, ekstradıtsııalanyp jatyr. Al, 3 kúdikti qamalyp, tergeý amaldary bastaldy. Jalpy, olardyń 20-ǵa jýyq qylmys jasaǵany anyqtalyp otyr, dep habarlaıdy QazAqparat tilshisi.

Shymkentte bıyl qurylǵan arnaıy jedel-tergeý toby 94 ınternet alaıaqtyq qylmysyn ashty. Jýyrda atalǵan top qylmysqa qatysty 1 kúdiktiden 46 bank kartochkasy men 6 uıaly telefon jáne 20 SIM karta tárkiledi. Tekserý barysynda kúdikti bank kartochkalaryn qupııa sózimen birge ózgelerden satyp alǵany belgili bolǵan. Sondaı-aq, óziniń syıaqysyn alyp, qalǵan aqshany alaıaqtyq áreketti uıymdastyrýshyǵa joldap otyrǵan.

«Qalamyzda tirkelgen árbir ınternet alaıaqtyq qylmystaryn ashý jáne tolyqqandy tergep-tekserý úshin polıtsııa departamentinde 4 aýdandyq polıtsııa basqarmasynyń qyzmetkerlerinen quralǵan arnaıy jedel-tergeý toby jumys isteıdi. Oǵan qalalyq polıtsııa departamentiniń tájirıbeli qyzmetkerleri jetekshilik etetin 8 tergeýshi, 8 jedel ýákil jumyldyryldy», - dedi Shymkent qalalyq Polıtsııa departamenti bastyǵynyń orynbasary, polıtsııa polkovnıgi Arman Beısenbaev.

Sonymen qatar, ol ınternettegi alaıaqtyq qylmystardyń basym kópshiligi bank salasyndaǵy operatsııalarmen jáne mıkroqarjylyq uıymdardyń jumysymen baılanysty ekenin aıtty. Sondyqtan, jeke qujattardy eshkimge bermeýdi jáne belgisiz azamattar ózin bank qyzmetkeri retinde tanystyrsa nemese kúdikti kóringen jaǵdaıda, jeke derekterdi aıtpaý kerektigin jetkizdi.

Aıta keteıik, Shymkent qalasynyń aýmaǵynda 1321 alaıaqtyq qylmys tirkelgen, onyń 366-sy ınternet arqyly jasalǵan.