Shymkentte «Ashyq» jobasyna qatysatyn nysandardyń jumys rejımi ózgerdi

ShYMKENT. QazAqparat - Shymkentte «Ashyq» jobasyna qatysatyn nysandardyń jumys ýaqytynan shekteýler alyndy. Bul týraly qalalyq Sanıtarııalyq-epıdemıologııalyq baqylaý departamenti basshysynyń orynbasary Aıdarqul Ahmetov aıtty, dep habarlaıdy QazAqparat tilshisi.

Shymkent qalasynyń Bas memlekettik-sanıtarııalyq dárigeriniń jańa qaýlysyna sáıkes, «Ashyq» jobasyna qatysatyn nysandardyń jumys jáne demalys kúndergi jumys rejımi belgilenbeıdi.

«Ashyq» jobasyna qatysatyn meıramhana, dámhana, kofehana tıpi boıynsha qoǵamdyq tamaqtaný obektilerine, bılıard, boýlıng, kontsert zaldaryna «jasyl» jáne «kók» mártebesi bar kelýshilerdi nysan tolymdyǵyn 60 paıyzdan asyrmaı qabyldaýǵa ruqsat etiledi. Balalar oıyn-saýyq ortalyqtary bir kelýshige keminde 10 sharshy metr alańdy qamtamasyz etip, toltyrylýyn 60 paıyzdan asyrmaı jumys isteı alady», - dedi ol.

Sondaı-aq «jasyl» - qaýipsiz mártebe boıynsha «Ashyq» jobasyna qatysatyn obektilerdiń jumys tártibi shektelmeıdi. Atap aıtar bolsaq, saltanatty, otbasylyq, eske alý sharalaryn ótkizý, konferentsııalar, forýmdar, adamdar kóp jınalatyn oıyn-saýyq jáne ózge de is-sharalar, kórmeler, marafondar uıymdastyrýda shekteý joq. Sondaı-aq sport keshenderi, sporttyq-saýyqtyrý ortalyqtary, fıtnes-ortalyqtar, ıoga-ortalyqtar, saýda, oıyn-saýyq ortalyqtary, saýda úıleri eshbir shekteýsiz qyzmet kórsete alady.

Jalpy Shymkentte búgingi kúni 9 112 kásipkerlik nysan «Ashyq» jobasymen jumys isteýde.

«Bul baǵytta jumystar jalǵasýda. Apta saıyn jobaǵa qatysýshylardyń qatary artyp keledi. Ózge de kásip ıelerin «Ashyq» jobasyna qatysýǵa shaqyramyn», - dedi «Atameken» kásipkerlik palatasy dırektorynyń orynbasary Sabıra Adambekova.

Aıta keteıik, keshe Shymkent qalasynyń Bas memlekettik-sanıtarııalyq dárigeri jańa qaýlyǵa qol qoıyp, qalada karantın rejımi jáne koronavırýs ınfektsııasynyń taralýynyń aldyn alý jónindegi shekteý sharalary epıdemıologııalyq jaǵdaı turaqtalǵanǵa deıin uzartylatynyn habarlaǵan bolatyn.