Shymkentte 6,5 myń adam taza sýǵa qol jetkizedi

NUR-SULTAN. QazAqparat – Shymkenttikterdiń ómir sapasyn jaqsartý úshin Jumyspen qamtýdyń jol kartasy aıasynda 18,8 mlrd teńgege 13 ınfraqurylymdyq joba iske asady, dep habarlaıdy QazAqparat tilshisi.

Bul týraly Shymkent qalasynyń ákimi Murat Áıtenov Úkimet otyrsynda aıtty.

«Jumyspen qamtý jol kartasy Shymkent qalasynda úsh baǵyt boıynsha iske asady. Birinshi baǵytta jalpy quny 18,8 mlrd teńgeni quraıtyn 13 nysan salynady. Qalǵan nysandardyń ekeýi 2020 jyldan qalǵan. Tek qurylys-montaj jumystaryn aıaqtaý kerek. 11 jańa nysan boıynsha memlekettik satyp alý konkýrstary aıaqtalyp, kelisimshart jasaldy. Nátıjesinde 6,5 myń adam taza sýmen jáne 17,6 myń adam elektr júıesimen qamtylady. Sondaı-aq 392 jumys orny qurylady», - dedi qala basshysy.

Ákimniń sózine qaraǵanda jol kartasynyń ekinshi baǵyty boıynsha 1,5 mlrd teńgeniń 6 paıyzdyq shaǵyn nesıesin bólip, árqaısysy 4,2 mln teńgelik 357 joba boıynsha 757 jumys orny qurý kózdelip otyr.

«Sonymen qatar, bıýdjetke keminde 45 mln teńgeniń salyǵy túsedi dep kútip otyrmyz. Búgingi tańda mıkroqarjy uıymy qurylyp, 250 áleýetti nesıe alýshynyń tizimi jasaqtaldy. Baǵdarlamanyń úshinshi baǵyty boıynsha bıznes sýbektilerine nesıe berýge, jarǵylyq kapıtalyn ulǵaıtýǵa, qarjylaı emes kómek kórsetýge Shymkent qalasyna 7,1 mlrd teńge bólinip, 70-ke jýyq jobany iske asyrý jáne 280 adamdy jumyspen qamtý josparlanǵan», - dedi shahar basshysy Murat Áıtenov.

Sondaı-aq, búgingi Úkimet otyrysynda Almaty oblysynyń ákimi Amandyq Batalov óńirde jylǵa deıin 1500 oryndyq 7 mektep salynatynyn aıtty. https://www.kazinform.kz/kz/almaty-oblysynda-1500-oryndyk-7-mektep-salynady_a3792149