Shymkentte 500-den asa bala ınklıýzıvti bilimmen qamtylǵan

ShYMKENT. QazAqparat – Shymkent qalasynda múmkindigi shekteýli 500-den asa bala bilim basqarmasyna qarasty mekemelerde ınklıýzıvti bilimmen qamtylǵan. Sonymen qatar, 997 oqýshy arnaıy mektep-ınternattarda jáne mektepterdegi arnaıy synyptarda 442, logopýnktterde – 2 686 bala bilim alýda, dep habarlaıdy QazAqparat tilshisi.

Qalalyq bilim basqarmasynyń málimetinshe, 959 bala úıde oqytylyp jatyr. Al, arnaıy balabaqshalarda 665 oqýshy qamtylǵan. Jarymjan jasóspirimderdiń óz deńgeıinde bilim alýy úshin mekemelerde arnaıy pandýstar ornalastyrylyp, ishki esikter men ájethanalar beıimdeýden ótkizilgen. Budan bólek, qaladaǵy arnaıy bilim beretin «Saıram kómekshi mektebine» 300 oryndyq qosymsha qurylys salý úshin memlekettik saraptama jumystary júrgizilýde.

Aıta keteıik, ınklıýzıvti oqytý – erekshe muqtajdyqtary bar balalardyń jalpy bilim beretin mektepterdegi oqytý úrdisin sıpattaýda qoldanylady. Mundaı oqytý negizinde balalardyń qandaı da bir dıskrımınatsııasyn joqqa shyǵarý men barlyq adamdarǵa degen teńdik qatynasty qamtamasyz etý, sonymen birge oqytýdyń erekshe qajettiligi bar balalarǵa arnaıy jaǵdaı qalyptastyrý ıdeologııasy jatyr.

Inklıýzıvti baǵyt mundaı balalardy oqýda jetistikke jetýge yqpal etip, jaqsy ómir súrý múmkinshiligin qalyptastyrady. Múmkindigi shekteýli balalarǵa mektepke deıingi oqý oryndarynda, mektepte jáne mektep ómirine belsene qatysýǵa múmkindik beredi. Sondaı-aq, oqýshylardyń teń quqyǵyn anyqtaıdy jáne ujym is-áreketine qatysýǵa múmkindik beredi. Adamdarmen qarym-qatynasyna qajetti qabilettilikti damytýǵa qolǵabys etedi.