Shymkentte 2029 jylǵa deıin 80 mektep salynady
Oqý-aǵartý mınıstri Ǵanı Beısembaev pen Shymkent qalasynyń ákimi Murat Áıtenov óńirdegi bilim berý júıesin ári qaraı damytý men ózekti máselelerdi naqty sheshýdi kózdeıtin birlesken qujatqa qol qoıdy.
Qala ákimdigi mektepke deıingi mekemelerde memlekettik tapsyrys kólemin 24 200 orynǵa deıin arttyrý, 26 mektepke deıingi mekemege kúrdeli jóndeý jumystaryn júrgizý, sondaı-aq memlekettik balabaqshalardyń materıaldyq-tehnıkalyq bazasyn 100% jańartýdy josparlap otyr. Mektepke deıingi tárbıe berý jáne oqytý salasynyń 7 000-nan astam pedagogi biliktiligin arttyrý kýrstarynan, al 1500-den astam pedagog qaıta daıarlaýdan ótedi.
Keıingi úsh jylda 81 mekteptiń ashylýy úsh aýysymdy jáne oryn tyǵyzdyǵy bar mektepter sanyn azaıtty. Jol kartasy aıasynda taǵy da 80 mektepti paıdalanýǵa berý josparlanyp otyr, onyń ishinde 38 myńǵa jýyq oqýshyny qamtıtyn 25 mektep «Jaıly mektep» baǵdarlamasy boıynsha salynady. Sonymen qatar, 30 orta bilim berý mekemesine keshendi jańartý júrgiziledi.
«Qalamyzda demografııalyq jáne mıgratsııalyq ósimderge sáıkes bala sany jyl saıyn artyp keledi. Osyǵan oraı, 2029 jylǵa deıin qýattylyǵy 87 950 oryndyq 80 mektep qurylysyn salý josparlanǵan. Sondyqtan, respýblıkalyq bıýdjetke usynys berildi», - dedi qala ákimi Murat Áıtenov.
Ásirese, bilim berý mekemelerinde balalar qaýipsizdigin qamtamasyz etýge aıryqsha kóńil bólindi. Qazir qaladaǵy memlekettik mekemelerdiń bári beınebaqylaý, dabyl túımeleri, týrnıkettermen jabdyqtalǵan. Jol kartasy aıasynda mektepterge qosymsha 2,5 myń beınebaqylaý júıesin satyp alý josparlanyp otyr jáne balabaqshalarda taǵy 7 000 beınebaqylaý júıesi ornatylady.
«Jol kartasyn aımaqtardyń bárine arnap ázirleý jáne qabyldaý jóninde jumystar júrgizilip jatyr. Shymkent qalasy basshylyǵy bilim berý salasynyń damýyna aıryqsha kóńil bólip otyrǵany qýantady. Keshendi jumystar aldymyzǵa Memleket basshysy qoıǵan mindetterdi iske asyrýǵa jáne ózekti máselelerdi sheshýge septigin tıgizedi. Jol kartasynda bilim berýdiń barlyq baǵyty qamtylǵan, onyń ishinde oqýshylardyń bilim berý júıesine qol jetkize alýyn jáne olardyń bilim berý protsesine qatysýyn arttyrý da bar. Shymkentte PMPK jáne psıhologııalyq-pedagogıkalyq túzetý kabınetteri júıelerin keńeıtý josparlanyp otyr, arnaıy pedagogter úshin jeti resýrstyq ortalyq ashylady jáne psıhologııalyq-pedagogıkalyq kómek alý oryndary boıynsha memlekettik tapsyrys segiz myńǵa jýyq orynǵa kóbeıtiledi», - dedi Oqý-aǵartý mınıstri Ǵanı Beısembaev.
Birqatar is-shara kámeletke tolmaǵandar arasyndaǵy qylmys sanyn azaıtýǵa, balalardy qorǵaý boıynsha oqý-jattyǵý jáne psıhologııalyq keńes berýge, sondaı-aq balalardyń shyǵarmashylyq jáne ıntellektýaldyq áleýetin damytýǵa arnalǵan.
Shymkentte eki Oqýshylar saraıy, úsh Caýyqtyrý lageri jáne alty Óner mektebi salynady. Jol kartasynyń aýqymdy bólimi bilim berý sapasyn arttyrýdy kózdeıdi. «Dana bala», «Shymkent Hub», «Sapaly bilim», «Sandyq muǵalim» túrli josparly tórt jobany iske asyrý josparlanǵan.
Bilim berý sapasyn ulttyq jáne syrtqy baǵalaý júıesin uıymdastyrý jáne júrgizý jónindegi jumystar jalǵasa beredi. Mektepke deıingi tárbıeleý jáne oqytý sapasyn baǵalaý talaptary engiziledi. Qala mektepteri jyl saıyn oqýshylardyń bilim alýdaǵy jetistikterine monıtorıng júrgizý men «PISA-based Test for Schools» halyqaralyq zertteýine qatysady.
Sonymen qatar, Prezıdent tapsyrmasyna oraı, mınıstrlik tehnıkalyq jáne kásibı aqysyz bilim berýmen 100% qamtý, kolledjderde pedagog mamandar daıyndaý boıynsha memlekettik tapsyrysty ulǵaıtý jáne kásiporyndardyń suranysy boıynsha maqsatty túrde mamandar ázirleý jóninde jumystar júrgizip keledi.
Jol kartasy iske asyrylatyn ýaqyt aralyǵynda Shymkentte 4 ókilettilik ortalyǵy ashylady jáne 8 kolledjge jóndeý jasalady. Pedagogterdiń kásibı deńgeıin arttyrý maqsatynda biliktilikti arttyrý kýrstary, arnaıy oqytýshylar men óndiristik oqý sheberleriniń halyqaralyq tájirıbeden ótýi, TjKB basshylyq quramyn menedjment boıynsha oqytý qarastyrylǵan.
Jalpy, jol kartasyna Shymkent qalasynyń bilim berý júıesiniń barlyq baǵytyn damytý sharalary engizilgen, olardyń iske asyrylýy balalardyń jan-jaqty jáne tolyqqandy damýyna jaǵdaı jasaýǵa múmkindik beredi.
