Shymkentte 14 ulttyń bıin bıleıtin robot tanystyryldy

ShYMKENT. QazAqparat  - Shymkentte álemniń birneshe elinen kelgen  ǵalymdar bas qosty.  Jıynda eldiń áleýmettik saıası jańǵyrý jaıy aıtylyp, bilim berýdiń 2025 jylǵa deıingi damý baǵyty baǵamdaldy. Sondaı-aq latyn grafıkasyna kóshýdegi is-áreketter talqylandy,  dep habarlaıdy  QazAqparat tilshisi.

Elbasy N.Nazarbaev  «Tórtinshi ónerkásiptik revolıýtsııa: Qazaqstannyń ǵylym, bilim jáne mádenıet salasyndaǵy jańǵyrýdyń jańa múmkindikteri» atty Joldaýynda 2018 jylǵa arnalǵan ІT tehnologııanyń ónerkásipti damytýǵa arnalǵan baǵdarlama bekitýdi tapsyrǵan bolatyn. Basqosýda ǵalymdar osy aqyldy tehnologııa men tsıfrlandyrý máselesin ortaǵa saldy.

Polsha, Malaızııa, Túrkııa, Qytaı, Ońtústik Koreıa, Reseı jáne Belarýs elderinen kelgen ǵalymdar ǵylymı-zertteý jumystarynyń nátıjelerin tanystyrdy. Birqatar mamandar pılotsyz ushý apparaty men  áskerı maqsattaǵy atmosferalyq spýtnık jobasyn usyndy. Budan bólek, ınnovatsııalyq jobalar kórmesi uıymdastyryldy.
  

Kópshilik nazaryn «Mekanoıd» dep atalatyn myna robot erekshe aýdardy. Uıaly telefon arqyly basqarýǵa bolatyn qultemir 14 ulttyń bıin bıleıdi. Sonyń ishinde qazaqtyń bıi «Qarajorǵa» da bar. 3 tilde sóıleıtin robotty Shymkenttegi №55 mekteptiń ujymy Novosibir qalasynan arnaıy tapsyryspen aldyrypty. Shákirtter sheteldik qultemirge qarap, óz týyndylaryn jasaýǵa bekinip otyr.

Aıta keteıik, halyqaralyq konferentsııaǵa myńnan astam maqala kelip túsken. Onyń 200-ge jýyǵy sheteldik ǵalymdarǵa tıesili. Jıynda oqylǵan árbir baıandama men ǵylymı eńbekter nazarǵa alynatyn boldy. Ári alty tomdyq jınaq bolyp basylmaq.