Shymkent turǵyny jurt joǵaltqan kýálikterdi paıdalanyp, onlaın 51 nesıe resimdegen

PETROPAVL. QazAqparat – Soltústik Qazaqstan oblysynyń polıtseıleri jurttyń joǵaltqan jeke kýálikterin paıdalanyp, olardyń atyna 51 nesıeni onlaıyn resimdegen Shymkent turǵynyn anyqtap, ustady, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, soltústikqazaqstandyq polıtseıler qyzmettik issapar kezinde er adamdy ustady. Shymkent qalasynyń 33 jastaǵy turǵyny joǵalǵan jeke kýálikter týraly aqparatty áleýmettik jelidegi habarlandyrýlardan alǵanyn moıyndady. Ol málimetterdi qoldanyp, jábirlenýshilerdiń atyna onlaın-nesıe, ádette bir adamǵa 100 000 teńgeden resimdegen. Osylaısha, alaıaq 51 nesıe resimdep, 5 mıllıon teńgeden astam qarajatty ıemdengen. Jábirlenýshilerdiń arasynda SQO turǵyndary da bolǵan.

Sot oǵan 4 jylǵa bas bostandyǵynan aıyrý jazasyn kesti.

Osyǵan oraı polıtseıler ınternet arqyly eshkimge jeke qujattardyń sýretin jibermeýge keńes beredi.

Máselen, bireýdiń jeke kýáligin taýyp alǵan jaǵdaıda, onyń fotosyn áleýmettik jelilerde jeke derekterin jasyrmaı jarııalaýǵa bolmaıdy. Kóp jaǵdaıda kıberqylmyskerler ınternet jelisinde osyndaı fotolardy ańdyp júredi. Olardy basqa bireýlerdi aldaǵan kezde, máselen, ózderin bóten adamdardyń atynan tanystyrǵanda nemese nesıe alǵanda paıdalanady.

«Quqyq qorǵaý organdary shaǵyn qarjy uıymdary ıelerimen jasaǵan ýaǵdalastyqtyń arqasynda sońǵy kezde qashyqtan nesıe alý rásimine senim artty, alaıda, saq bolý qajet. Jeke derekterińizdi, qupııasózder, pın-kod, bank kartasynyń syrtyndaǵy CVV-kodty, sms-habarlamamen keletin bir jolǵy kirý qodtaryn qupııa saqtaýǵa keńes beremiz», - deıdi SQO Polıtsııa departamenti krımınaldyq polıtsııa basqarmasynyń bastyǵy Marat Jumalıev.