Shymkent munaı óńdeý zaýytynda kúrdeli jóndeý jumystary merziminen buryn aıaqtaldy
Óndiristiń úzdiksiz jáne apatsyz jumys isteýin qamtamasyz etý maqsatynda júrgizilgen kúrdeli jóndeý jumysy aıasynda zaýytta tehnologııalyq jabdyqtar, qubyr jelileri, óndiristik peshter, sorapty-kompressorlyq toraptar, kabel jelileri, elektr jabdyqtary, negizgi jáne qosalqy qondyrǵylardyń baqylaý-ólsheý aspaptary men avtomatıkasy tehnıkalyq kýálandyrýdan jáne kúrdeli jóndeýden ótkizildi.
Zaýytty jańǵyrtý jobasy aıasynda salynǵan jańa, úlken tehnologııalyq nysan - ızomerleý qondyrǵysyn jumys istep turǵan tehnologııalyq jelilerge biriktirip, qosý jumystary júrgizildi.
Qazirgi ýaqytta óndiris tehnologııasyna jáne qaýipsizdik erejelerine sáıkes taýarly ónim alynatyn bolyp, zaýyttyń tehnologııalyq qondyrǵylaryn kezeńmen iske qosý jumystary júrgizilýde.
2017 jylǵy 31 naýryzda «PetroQazaqstan Oıl Prodakts» JShS-de shıkizatty aldyn ala gıdrotazalaý blogy bar jeńil benzın fraktsııalaryn ızomerleý qondyrǵysynda qurylys-montajdaý jumystarynyń aıaqtalǵany jóninde aktilerge qol qoıylǵan bolatyn. Qazirgi ýaqytta osy nysanda iske qosý-retteý jumystary júrgizilýde. Bul jumystardy aǵymdaǵy jyldyń shildesine deıin aıaqtaý kózdelýde. Jumystar aıaqtalǵannan keıin K4, K5 ekologııalyq klastaǵy joǵary oktandy benzınderdi alýǵa jáne olardyń óndirisin jylyna 460 myń tonnaǵa arttyrýǵa múmkindik beretin ızomerleý qondyrǵysy iske qosylatyn bolady.
Sondaı-aq, Shymkent munaı óńdeý zaýytynda zaýyttyń shıkizat óńdeý qýatyn jylyna 5,25 mln. tonnadan 6 mln. tonnaǵa deıin arttyrýǵa jáne shıkizat óńdeý tereńdigin joǵarylatýǵa baǵyttalǵan jańǵyrtý jobasynyń ekinshi kezeńi aıasyndaǵy jumystar da qarqyndy júrgizilip jatyr.
