Shymkent munaı óńdeý zaýytyn jańǵyrtýdyń alǵashqy kezeńi aıaqtaldy
Mınıstrdiń aıtýynsha, joǵary oktandy benzınderdi shyǵarý jylyna 460 myń tonnaǵa, dızel otyny 226 myń jáne avıaotyndy óndirý jylyna 27 myń tonnaǵa artatyn bolady. Buǵan qosa, zaýytta jańǵyrtý jobasynyń ekinshi kezeńi de júrgizilýde. Ol kezde zaýyttyń shıkizat óńdeý qýatyn jylyna 5,25 mln. tonnadan 6 mln. tonnaǵa deıin arttyrýǵa jáne shıkizatty óńdeý tereńdigin joǵarylatýǵa múmkindik bar. Bul - janar jaǵarmaıdyń kólemin arttyryp qana qoımaı, ekologııalyq taza ónim shyǵarýǵa múmkindik beredi.
«Men oılaımyn, osy maýsym aıynda zaýytta jańǵyrtýdyń birinshi kezeńiniń jumystary aıaqtalady. Sonda, bıyldyń ózinde 1 tonna munaıdan benzın, dızel otyny, avıakerasın shyǵarylatyn bolady. Biraq mazýt pen gaz azaıady. Sondyqtan ol da óz tıimdiligin, áserin beredi. Óıtkeni kóbirek benzın shyǵarylsa, biz óz benzınimizdi óz naryǵymyzda satyp, erteń Reseıden suramaıtyn bolamyz.
Qazirdiń ózinde Reseıden AI-92 benzınin alsaq, onyń 30 paıyzyn biz qamtamasyz etip otyrmyz. Qalǵanyn Reseı zaýyttarynan alyp kelemiz. Sondyqtan eger osy jańǵyrtý máselelerin qolǵa alyp, bıyl jalpy bitirsek, kelesi jylda Reseıden benzın nemese dızel otynyn alyp kelý qajettiligi bolmaıdy. Óıtkeni biz óz munaıymyzdan, ıaǵnı úsh zaýyttan benzın, avıakerosın, dızel otynyn shyǵaryp, ishki naryqty qamtamasyz etetin bolamyz»,-dedi Qanat Bozymbaev.
Reseıden janar-jaǵarmaıǵa degen táýeldilikten qutylamyz degen mınıstr sol kezde baǵa saıasynda eshqandaı ózgeris bolmaıtyndyǵyn atap ótti.
«Eger baǵalar týraly aıtatyn bolsaq, ózimizdiń munaıymyzdan benzın, dızel otyny shyǵarylyp, ishki qajettilikti 100 protsent qamtamasyz etsek, árıne baǵaǵa áser etetin jaqsy faktorlar bizdiń jaǵymyzdan kóbirek bolady. Onda olardyń baǵasyn retteý de jeńildeıdi. Onda bizge qandaı baǵa kerek bolady, sondaı baǵalardy árıne tıimdiligin oılap, jasaıtyn bolamyz. Kelesi jyldan bastap biz jańǵyrtý máseleleriniń bárin bitirsek, bizde 2 mln tonnadan astam A-92 benzıni shyǵarylatyn bolady jáne biz 2 mln tonnany eksporttaýdy bastaımyz. Jalpy eldi dızel otynymen de qamtamasyz ete alamyz, Ortalyq Azııany jáne Aýǵanstandy qamtamasyz etemiz»,-dedi Energetıka mınıstri.
Zaýytty aralap shyqqannan keıin Qanat Bozymbaev jańǵyrtý jobasyn teziraq aıaqtap, Qazaqstan úshin joǵary klasty avtomobıl otynynyń qajetti kólemin alý úshin jumystardy qarqyndy júrgizýdiń mańyzdylyǵyn atap ótti.
Esterińizge sala ketsek, 31 naýryzda Shymkent munaı óńdeý zaýytynda zaýytty jańǵyrtý jobasynyń birinshi kezeńiniń iri tehnologııalyq nysany bolyp tabylatyn - shıkizatty aldyn ala gıdrotazalaıtyn blogy bar jeńil benzın fraktsııalaryn ızomerleý qondyrǵysynda qurylys-montajdaý jumystarynyń mehanıkalyq bóligi aıaqtalǵany týraly aktige qol qoıylǵan bolatyn.
Qazirgi ýaqytta, atalǵan nysanda iske qosý-retteý jumystary júrgizilip jatyr jáne ol jumystardy aǵymdaǵy jyldyń shildesinde aıaqtaý josparlanǵan. Nysan iske qosylǵannan keıin kepildi paıdalaný kórsetkishterine qol jetkizilip, 2017 jyly K4, K5 ekologııalyq klastaǵy (Evro-4, Evro-5 analogy) joǵary oktandy benzınder men dızel otyny alynatyn bolady jáne joǵary oktandy benzınderdi óndirý jylyna 460 myń tonnaǵa, dızel otynyn óndirý jylyna 226 myń tonnaǵa, avıaotyndy óndirý jylyna 27 myń tonnaǵa artatyn bolady.
Buǵan qosa, Shymkent munaı óńdeý zaýytynda jańǵyrtý jobasynyń ekinshi kezeńiniń aıasyndaǵy jumystar da qarqyndy júrgizilýde. Jobanyń ekinshi kezeńi zaýyttyń shıkizat óńdeý qýatyn jylyna 5,25 mln. tonnadan 6 mln. tonnaǵa deıin arttyrýǵa jáne shıkizatty óńdeý tereńdigin joǵarylatýǵa baǵyttalǵan. Jobanyń ekinshi kezeńi tehnologııalyq turǵydan kúrdeli bolyp keledi jáne joǵary oktandy motorly otyndardy alatyn, qýaty jylyna 2,0 mln. tonna munaıdy tereń óńdeıtin katalıtıkalyq krekıng qondyrǵysy keshenin salýdy qarastyrady.
Jobanyń ekinshi kezeńi aıaqtalǵanda zaýytta joǵary oktandy benzınderdi óndirý jylyna 2 270 myń tonnaǵa deıin, dızel otynyn óndirý jylyna 1 916 myń tonnaǵa deıin, avıaotyndy óndirý jylyna 400 myń tonnaǵa deıin, al zaýyt ónimderiniń QR naryǵyndaǵy úlesi 35%-ǵa deıin artatyn bolady.
Jalpy Shymkent munaı óńdeý zaýytyn jańǵyrtý jobasy boıynsha 11 tehnologııalyq qondyrǵyny jáne jalpy zaýyt sharýashylyǵynyń 29 nysanyn salý jáne rekonstrýktsııalaý qarastyrylǵan.
Joba boıynsha bas merdiger jumystaryn munaıgaz ónerkásibi salasynda ınjınırıngtik jáne qurylys jumystarymen aınalysatyn iri kompanııalardyń biri - «SRESS» (China Petroleum Engineering & Construction Corporation) kompanııasy oryndaýda.
Jumys saparynyń nátıjesi boıynsha energetıka mınıstri Q. Bozymbaev Shymkent munaı óńdeý zaýytynyń basshylyǵyna jańǵyrtý jobasy boıynsha ári qaraı júrgiziletin jumystarǵa qatysty birqatar tapsyrmalar berdi.
