Shymkent qalasynda koronavırýs juqtyrǵan 5000-nan astam naýqas em qabyldaýda

ShYMKENT. QazAqparat - Shymkent qalasynda koronavırýs juqtyrǵan 5256 naýqas emdelip jatyr. Onyń 205-i statsıonarda em qabyldap jatsa, qalǵany úı jaǵdaıynda emdelýde. Bul týraly Shymkent qalasynyń densaýlyq saqtaý basqarmasynyń basshysy Baqytjan Pozılov aıtyp ótti, dep habarlaıdy QazAqparat tilshisi.

Jalpy statsıonarda jatqan 205 naýqastyń ishinde 6 júkti áıel men 18 jasqa deıingi 29 naýqas bar. Onyń 24-i jan saqtaý bóliminde jatyr. Al, 5 naýqastyń jaǵdaıy aýyr bolǵandyqtan, IVL apparataryna tańylǵan.

«Shymkent qalasy qazir jasyl aımaqta. Jyl basynan beri koronavırýs juqtyrǵandardyń sany 6646 adam bolyp otyr. Al, 1332 adam indetten tolyǵymen aıyǵyp shyqty. Ókinishke oraı, 56 adam qaıtys boldy» - dedi Baqytjan Joldasbekuly.

Qazirgi tańǵa mamandandyrylǵan ınfektsııalyq statsıonarlarda barlyǵy 783 tósek oryn bar. Ondaǵy tolymdylyq 26%-dy quraıdy, 578 tósek oryn bos. Infektsııalyq statsıonardyń jansaqtaý bóliminde 130 tósek oryn jasaqtalǵan.

Egý naýqany bastalǵaly barlyǵy 597 341 adam vaktsınatsııalanǵan. Onyń ishinde 583 468 adam vaktsınanyń eki komponentin alypty. Al, Pfizer vaktsınasynyń I komponentin 46 564 adam, II komponentin 21 738 adam qabyldaǵan. Sondaı-aq, 112 308 adam revaktsınatsııalaýdan ótken.

«Qalada 45 ekpe egý pýnkti jumys jasaýda. Bastapqy medıtsınalyq kómek boıynsha 41 emhanada 158 mobıldi brıgada jasaqtalǵan. Olar tańǵy saǵat segizden bastap jumys isteýde. Naýqastardy baqylaý, emdeý, dári-dármek taratý sekildi ózderine bekitilgen jumystardy atqaryp jatyr» - dedi Baqytjan Pozılov.