«Shymkent Development 2018» halyqaralyq ınvestforýmyna 20 eldiń delegattary qatysty
Forým alańyna saıasatkerler, álemdik jáne otandyq bıznes kóshbasshylary, iri korporatsııalar men qarjy ınstıtýttarynyń basshylary jınaldy.
Alqaly jıynǵa álemniń 20 memleketinen 100-den astam al, qazaqstandyq 300 delegat qatysty. Onyń ishinde 25 adam spıker retinde tirkelgen.
Shymkent ákimi Ǵabıdolla Ábdirahymov qalanyń ekonomıkalyq múmkindikteri men bolashaqta qolǵa alynatyn jobalar týraly baıandady Sondaı-aq «Copenhagenize Design Co» kompanııasynyń bas dırektory, Kopengagen qalasynyń eks-meri Morten Keıbll, belgili reseılik ýrbanıst, «Adamdarǵa arnalǵan qala» jobasynyń avtory Arkadıı Gershman, Dúnıejúzilik banktiń Qazaqstandaǵy turaqty ókili Ato Braýn, Shyǵys Evropa boıynsha óńirlik dırektory Nıkolas Nıtos jáne basqalar sóz sóıledi.
Investıtsııalyq forýmda 200 mln AQSh dollaryn quraıtyn 11 memorandýmǵa qol qoıyldy.
Sheteldik kompanııalar qalada mıkrofıbra óndiretin toqyma fabrıkasynyń qurylysyn salý jáne qalalyq jedel járdem qyzmetiniń avtoparkin jańǵyrtý, Shymkent-sıtı aýmaǵynda turǵyn úıler men ákimshilik ǵımarattyń jáne jańa saıabaqtyń qurylysyn salý syndy birqatar iri jobalarǵa ınvestıtsııa salýǵa nıetti.
Eń birinshi quny 13 mln AQSh dollaryn quraıtyn qalalyq jedel járdem qyzmetiniń avtoparkin jańǵyrtý jobasy boıynsha qala ákimi Ǵ. Ábdirahymov pen «Hyundai Trans Auto» JShS-niń dırektory V. Vıatkın jáne «MAYDAY KAZKHSTAN» JShS-niń tóraǵasy A.Hıdaıat arasynda úsh jaqty áriptestik memorandýmy túzildi.
Budan bólek, ákim «Colosseo» kompanııasynyń prezıdenti ıAn Enchamen quny 40 mln AQSh dollary bolatyn Qajymuqan atyndaǵy ortalyq stadıondy qaıta jańartý jumystary boıynsha kelisimge qol qoıdy.
Aıta keteıik, osy jyly qalaǵa 524 mlrd. teńge kólemindegi ınvestıtsııa tartylǵan. Bul ótken jylmen salystyrǵanda 3 esege artyq.
