Shymbulaq shıpajaıynyń aýmaǵyn polıtseıler shańǵymen baqylap júr

ALMATY. QazAqparat – Arnaıy daıyndyqtan ótken polıtseıler «Shymbulaq» taý shańǵysy bazasynda qoǵamdyq tártipti qadaǵalaıdy. Olar asynyp júretin úırenshikti áskerı qarýlarynyń ornyna, shańǵy alady, dep habarlaıdy QazAqparat tilshisi.

«Shymbulaq» taý shańǵysy kýrortynyń dırektory Rınat Ábdirahmanovtyń aıtýynsha, atalǵan joba 2019 jyldan beri júzege asyrylyp keledi.

«Bizde kórinbeıtin maıdan jaýyngerleri bar. Desek te, bıyl qaladan shıpajaı aýmaǵyn shańǵymen júrip baqylaıtyn polıtsııa qyzmetkerlerin suradyq. Ótinishimiz qanaǵattandyryldy. Kelesi dúısenbiden bastap 10 polıtsııa qyzmetkerin shańǵy tebýge úıretý úshin oqý protsesin bastaımyz», - deıdi spıker.

Sondaı-aq ol kýrortta shańǵy patrýlderi de jumys isteıtinin aıtty. Bıyl olardyń sany 16 adamǵa artty.

«Olardyń tórteýi shańǵy tebýdiń qaýipsizdigin baqylap, polıtsııamen birge ózara jumys isteıdi», - dep qosty ol.

Sonymen qatar, spıker demalys ornyndaǵy qaýipsizdik máselesi taý shańǵysy kýrorttarynyń qyzmetin retteıtin zańnyń joqtyǵynan týyndap otyrǵanyn tilge tıek etti.

Onyń aıtýynsha, shańǵy patrýlderi nemese kýrort qyzmetkerleri erejeni buzý týraly eskertkenderi úshin klıentterden jıi zardap shegedi.

Rınat Ábdirahmanov tártip saqshylary halyqaralyq FIS erejesiniń saqtalýyn qadaǵalaıtynyn túsindirdi.

«Demalys kúnderi bes polıtsııa qyzmetkeri men eki kýrort mamandary, al jumys kúnderi eki polıtsııa men eki kýrort qyzmetkeri kezekshilikte bolady. Tártip saqshylary Police degen jazýy bar arnaıy keýdeshe kıedi»,- dedi ol.

Jalpy, «Shymbulaq» dırektorynyń aıtýynsha, shıpajaıǵa kelýshiler sany jyl saıyn artyp keledi jáne ótken maýsymda ol absolıýtti rekordqa jetti – 1 mln astam adam.

Foto: xxl.no