Shylym shegetin qazaqstandyqtardyń sany azaıyp keledi - mınıstrlik

NUR-SULTAN. QazAqparat – QR Densaýlyq saqtaý birinshi vıtse-mınıstri Marat Shoranovtyń aıtýynsha, keıingi kezde shylym shegetin qazaqstandyqtardyń sany azaıyp keledi, dep habarlaıdy QazAqparat tilshisi.

Bul týraly ol ortalyq kommýnıkatsııalar qyzmetinde ótken brıfıngide aıtty.

«2020 jyly «Halyq densaýlyǵy jáne densaýlyq saqtaý júıesi týraly» kodeks qabyldandy. Bul qujatta temekige qarsy sharalardy retteý kózdelgen. Temekiniń IQOS, Glo, veıp sııaqty túrlerin kádimgi shylymǵa teńestirý, temekini búkil saýda oryndarynda kórneki jerge shyǵaryp qoıýǵa tyıym salý, qoǵamdyq orynda qorqor tartýǵa tyıym salý, nasybaı sııaqty «tútinsiz» shylymnyń aınalymyna tyıym salý, sondaı-aq temeki satyp alýǵa quqyly azamattardyń jasyn 18-den 21-ge kóterý baǵytynda normalar qabyldandy», - dep eske saldy vıtse-mınıstr.

Onyń aıtýynsha, qabyldanǵan sharalar temeki ónimderiniń dástúrli túrin tutyný kólemin qysqartqan.

«Qazaqstandyqtardyń 70% shylym shegýge tyıym salý jáne temeki tútininen azat orta qurý bastamasyn qoldaıdy. Ulttyq zańnamanyń Dúnıejúzilik densaýlyq saqtaý uıymy konventsııalarynyń aıasynda qabyldaǵan talaptaryn oryndaý tıimdi dep esepteımiz. Onyń ishinde «qyzdyrylatyn» temeki de bar», - dedi Marat Shoranov.

Buǵan deıin elimizde jalpy temekiniń aktsızi ósetini habarlanǵan edi.