Shyǵys Qazaqstannyń qaı aýdandarynda sý basý qaýpi joǵary
Aqpan aıynyń basynan beri óńirde sý tasqynyna joǵary daıyndyq rejımi engizilip otyr. Bul týraly ShQO Aımaqtyq kommýnıkatsııalar qyzmetinde ótken baspasóz máslıhatynda oblystyq TJD tótenshe jaǵdaılardyń aldyn alý basqarmasynyń bastyǵy Erlan Baltabaev aıtyp berdi.
«Shyǵys Qazaqstanda sý tasqyny bolýy yqtımal 71 eldi meken bar. Onyń ishinde 15-inde qaýip tolyǵymen joıylyp, 46-synda azaıtyldy. Qys bastalǵaly jergilikti atqarýshy organdar 201 myń tekshe metrden astam qar shyǵardy», - deıdi ol.
Erlan Baltabaevtyń aıtýynsha, jyl saıyn tótenshe jaǵdaılardyń aldyn alý maqsatynda sý tasqynyna qarsy is-sharalar ótkiziledi. 2023 jylǵy sý tasqyny kezeńinen oıdaǵydaı ótý úshin bógetter, toǵandar men sý qoımalarynyń janynda ornalasqan eldi mekenderdegi halyqty habardar etý shemalary jańartyldy. Injener-gıdrotehnıkter bógetterdiń, toǵandardyń jáne sý qoımalarynyń tolý jaǵdaıyna tekserý júrgizilýde.
«Qazgıdromet» RMK Shyǵys Qazaqstan fılıalynyń basshysy Lázzat Bolatqannyń sózinshe, aımaqtaǵy qar jamylǵysynyń bıiktigi 14-ten 95 sm-ge deıingi aralyqta. Gıdrologııalyq jaǵdaı turaqty. Sý deńgeıi synı belgilerden tómen. Ózenderdegi muz qalyńdyǵy 12-den 75 sm-ge deıin.
Sondaı-aq TJD qyzmetkerleri sý tasqyny kezeńinde Altaı, Glýbokoe, Ulan, Shemonaıha, Tarbaǵataı, Katonqaraǵaı jáne Zaısan aýdandarynda qaýip joǵary ekendigin aıtty. Qazirgi ýaqytta qutqarýshylar halyqqa úgit-nasıhat jumystaryn júrgizip, saqtyq sharalarymen tanystyrýda.