Shyǵys Qazaqstanda jastarǵa jeke kásip ashýǵa 300-den astam grant beriledi

ÓSKEMEN. QazAqparat – Shyǵys Qazaqstan oblysynyń jastaryna jeke kásip ashý úshin 300-den astam grant beriledi, dep habarlaıdy QazAqparat tilshisi.

Búgin – halyqaralyq jastar kúni. Shyǵys Qazaqstanda barlyǵy 118 646 jas turady. Bul – jalpy halyqtyń 16,5 paıyzy.

ShQO Aqparat ortalyǵynyń málimetinshe, merekege oraı óńirde birqatar shara ótkizildi. NEET sanatyndaǵy jastarmen kezdesýler uıymdastyrylyp, memlekettik qoldaý sharalary túsindirildi.

«Qala jáne aýdan ákimderiniń qatysýymen belsendi, daryndy jastarmen dıalog alańdary, ıntellektýaldyq oıyndar, volonterlik jáne qaıyrymdylyq aktsııalary, áleýmettik jelilerde chellendjder ótti. Qazirgi ýaqytta oblysta «Eńbek» baǵdarlamasy boıynsha 6 613 adam tehnıkalyq jáne kásiptik bilim alyp jatyr. 2022 jyly jumyssyz jastarǵa jeke kásip ashýǵa 312 grant beriledi», - delingen ortalyq habarlamasynda.

Sondaı-aq, «Sýbsıdııalanatyn jumys oryndaryn uıymdastyrý arqyly kásipkerlerdi qoldaý» baǵyty boıynsha 1 057 jas jumysqa ornalastyryldy. «Dıplommen aýylǵa» jobasy aıasynda 290 jas mamanǵa kóterme járdemaqy, 112 jasqa turǵyn úı satyp alýǵa memlekettik nesıe berildi. «Jasyl el» baǵdarlamasymen 495 adam jumyspen qamtylǵan.