Shyǵys Qazaqstanda súńgýirler sý aıdyndarynyń túbin tekserip jatyr

ÓSKEMEN. QazAqparat – Shyǵys Qazaqstan oblysynda súńgýirler sý aıdyndarynyń túbin tekserýde, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, óńirde súńgýirler sý aıdyndarynyń túbin tekserýge kiristi.

Kóbine demalys oryndary men balalar lagerleri tekseriledi.

«Túbi tekserilgen shomylý oryndary, qaýipsizdik talaptaryna sáıkes jabdyqtalǵan jaǵajaı – bul demalys kezinde eshkimniń zardap shekpeıtininiń kepili. Sondyqtan da qutqarýshylar shomylý oryndaryndaǵy tekseris jumystaryna óte muqııat qaraıdy. Súńgýir-qutqarýshylar sý astyna túsken kezde shomylýshylarǵa qaýip tóndiretin zattar taýyp alyp jatady. Atap aıtqanda, shyny bótelkeler, metall synyqtar, armatýra jáne basqa da túrli qaldyqtar» - deıdi oblystyq TJD azamattyq qorǵanys basqarmasynyń bastyǵy Rýslan Orynbekov.

Onyń aıtýynsha, sýasty tekserýler tıisti aktimen resimdeledi.

Demalys bazalary men lager ıeleri shomylý oryndarynyń normaǵa sáıkestigin, ýaqtyly tekserilýin qadaǵalaýy kerek.

«Ol úshin olar bizge ótinim berýi tıis. Sodan keıin departamenttiń kásibı súńgýirleri sý aıdyndarynyń túbin tegin tekserip beredi», - delingen aqparatta.

Osy rette, qutqarýshylar azamattardan tek shomylýǵa ruqsat etilgen jaǵajaılarǵa ǵana barýdy suraıdy.

Ata-analar balalaryna qaýipsizdik sharalaryn túsindirip, sý jaǵasynda jalǵyz qaldyrmaýy tıis.

Eske salsaq, buǵan deıin Shyǵys Qazaqstanda byltyr jazda 7 adam sýǵa batyp ketkenin habarlaǵan edik.