Shyǵys Qazaqstanda qar kóshkini qaýpi bar kezeń bastaldy
ShQO tótenshe jaǵdaılar departamenti baspasóz qyzmetiniń málimetine súıensek, óńirde qar kóshkini júrý qaýpi bar kezeń bastaldy.
Bul kezeń jyldaǵy dástúr boıynsha sáýir aıyna deıin jalǵasady.
«Oblys aýmaǵynda kóshkin júrý qaýpi bar 497 ýchaske tirkelgen. 325 ýchaskede 71 nysandy qar basý qaýpi joǵary. Onyń ishinde 44 turǵyn úı bar. Sondaı-aq 93 shaqyrym kólik joly, (15 shaqyrymy - respýblıkalyq mańyzy bar, 78 shaqyrymy - oblystyq mańyzy bar joldar) qar astynda qalýy múmkin. Eń qaýipti baǵyttar «Óskemen-Samar» tasjolynyń 95-102,132-137 shaqyrymdary, «Óskemen-Taýly Úlbi» tasjolynyń 30-37 shaqyrymy, «Óskemen-Soltústik-Serebrıansk» tasjolynyń 58-65 shaqyrymy», - delingen aqparatta.
5 demalys bazasy kóshkin qaýpi bar ýchaskede ornalasqan. Onyń ekeýi – Rıdder qalasynda, úsheýi – Taýly Úlbi aýylynda.
«2022 jyldyń jazynda Altaı jáne Katonqaraǵaı aýdandarynda qar ustaıtyn 70 qalqan jóndelip, qalpyna keltirildi. 20 ýchaskede «Abaılańyz, kóshkin qaýpi bar» dep jazylǵan 40 eskertý belgisi ornatyldy», - delingen habarlamada.
