Shyǵys Qazaqstanda 77 aýyl ákimi saılanady

ÓSKEMEN. QazAqparat – Shyǵys Qazaqstan oblysynda 25 shildede aýdandyq mańyzy bar qalalar, aýyldar, kentter men aýyldyq okrýgter ákimderiniń alǵashqy tikeleı saılaýy ótedi, dep habarlaıdy QazAqparat tilshisi.

Shyǵys Qazaqstandaǵy qalalyq jáne aýdandyq saılaý komıssııalary 25 shilde kúni ótetin aýyl ákimderiniń saılaýyna daıyndyq júrgizýde. Bıyl óńirdegi 16 aýdanda 77 aýyl ákimi saılanbaq.

Oblystyq saılaý komıssııasynyń tóraǵasy Ersaıyn Nabıevtyń aıtýynsha, tikeleı saılaý ótkizý Qazaqstandaǵy saılaý júıesiniń damýyndaǵy mańyzdy qadam. Bul aımaqtyq saılaý naýqanyn uıymdastyrýdaǵy jańa tájirıbe jınaqtaýdyń birden-bir múmkindigi.

«Buryn aýyldyq okrýg ákimderin jergilikti máslıhat depýtattary saılaıtyn edi. Endi naqty ákimshilik aýmaqtyń halqy ákimderdi tikeleı saılaı alady. Mundaı ózgeristiń arqasynda ákim ózi turatyn eldi meken jurtshylyǵynyń senimi men qoldaýyna ıe bolý úshin nátıjeli eńbek etýge talpynatyn bolady», - dedi Ersaıyn Nabıev.