Shyǵys Qazaqstanda 7 myńǵa jýyq túlek UBT tapsyrady
ShQO bilim salasynda sapany qamtamasyz etý departamentiniń basshysy Zeınep Maqsutovanyń aıtýynsha, UBT 20 maýsym men 5 shilde aralyǵynda ótkiziledi.
«Bıyl 131 myń ótinish berildi. 2019-2020 oqý jylynda oblys mektepterin 8 204 oqýshy aıaqtady, onyń 84,4% (6 921 túlek) UBT tapsyrýǵa nıet bildirgen. Ereje boıynsha baǵalaý ózgermegen, mindetti jáne beıindi pánder boıynsha júrgiziledi. JOO qabyldaý rásimine jańashyldyqtar engizilgen. Soǵan sáıkes oqýǵa túsýshi shektik upaı ala almasa, birinshi sessııa aıaqtalǵan ýaqyt aralyǵyna deıin aqyly bólimge oqýǵa tapsyrýǵa quqyly. Budan ári, stýdent jyl aralyǵynda test tapsyrýǵa múmkindik alady. Sondaı-aq UBT nátıjesi boıynsha sertıfıkattar qaǵaz túrinde emes, elektrondy nusqada beriledi», - dedi ol.
Zeınep Maqsutova óz sózinde testileýge kirgizý barysynda tyıym salynǵan zatpen anyqtalǵan jáne óz ornyna bóten adamdy kirgizýge talpynǵan túlek sol testileýge jiberilmeıtinin jáne jyl kóleminde UBT tapsyra almaıtynyn atap ótti.
«UBT aıaqtalǵannan keıin kúntizbelik jyldyń 25 tamyzyna deıin beınebaqylaý jazbalary taldanady, túsýshiniń tyıym salynǵan zattardy paıdalanǵany anyqtalǵan jaǵdaıda onyń UBT men bilim berý grantyn taǵaıyndaý konkýrsynyń nátıjeleri joıylady. Sonymen qatar shekteý sharalarynyń kúsheıtilýine baılanysty ata-analar, pedagogter, bógde adamdar UBTÓP ǵımarattary aımaǵyna jiberilmeıdi. Testileýge qatysýshylar arasynda, balanyń qozǵalys jolynda, aýdıtorııalarda sary jolaqty bógettermen belgilengen 2 metr qashyqtyq saqtalady. Sanıtarlyq sharalar kúsheıtilip, talapkerler 5 túrli zalalsyzdandyrý sharasynan ótedi», - deıdi departament basshysy.
