Shyǵys Qazaqstanda 529 jer úıdiń peshinde aqaý bary anyqtaldy

Shyǵys Qazaqstan oblysynda pesh jaǵyp otyrǵan jer úılerden 529 buzýshylyq anyqtaldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar jylytý maýsymy taıaǵan saıyn jer úılerdi aralap, baqylaýdy kúsheıtýde.

«Qaýipsizdik sharalary ár úıde saqtalýy kerek. Kóbinese, órt peshti paıdalaný kezinde qaýipsizdik erejelerin buzýdan, elektr qurylǵylaryna júktemeniń artýynan, turǵyn úıde temeki shegýden shyǵyp jatady. TJD qyzmetkerleri azamattarǵa nusqaýlyq ótkizip, úı ıelerine peshti qysqy kezeńge qalaı daıyndaý kerektigin túsindirýde. Jaýapty jandar jazda peshti sylap, murjany tazalap qoıady», - deıdi departamenttiń memlekettik órt baqylaý basqarmasynyń bastyǵy Nurjan Ómirjanov.

Onyń aıtýynsha, janǵysh zattar, perdeler peshke janaspaýy kerek. Pesh ústinde aıaq kıim men kıim qaldyrý qaýipti.

Sonymen qatar peshtiń esiginiń astyndaǵy edenge kem degende 70h50 sm metall paraqty shegeleý qajet. Bul edendi peshten túsken shoqtan qorǵaıdy. Ot jaǵý kezinde peshtiń janyna aǵash pen qaǵaz qoıýǵa bolmaıdy.

Pesh pen jıhaz nemese basqa da ońaı janatyn zattarǵa deıingi qashyqtyq keminde bir metr bolýy kerek. Pesh jaǵý úshin benzındi jáne kez kelgen basqa tez tutanatyn suıyqtyqtardy qoldanýǵa qatań tyıym salynady.

«Osy ýaqytqa deıin qutqarýshylar áleýmettik turǵyda osal otbasy turatyn 3574 úıdi túgeldeı aralap shyqty. Olarda qazirgi ýaqytta kómirtegi totyǵyn anyqtaıtyn datchıkter ornatylýda. Budan bólek, mamandar peshpen jylytylatyn 1800-den astam turǵyn úıge bardy. Onda 529 buzýshylyq anyqtalyp, turǵyndarǵa eskertý jasaldy», - delingen aqparatta.