Shveıtsarııa 17 aqpannan bastap koronavırýs shekteýlerin alyp tastamaq

NUR-SULTAN. QazAqparat - Shveıtsarııa bıligi 17 aqpannan bastap koronavırýs pandemııasyna baılanysty barlyq shekteýlerdi alyp tastaý týraly sheshim qabyldady.

Bul týraly QazAqparat Covid-19 taralýyna jol bermeý jónindegi vedomstvoaralyq komıssııasynyń Telegram kanalyna silteme jasap habarlaıdy.

«Beısenbiden bastap dúkenderge, meıramhanalarǵa, mádenı mekemelerge jáne is-sharalarǵa betperdesiz nemese COVID sertıfıkatynsyz barýǵa bolady. Sondaı-aq, jumys ornynda maskalardy mindetti túrde kııý jáne úıden jumys isteý týraly usynymdar alynyp tastaldy», - dep habarlady Úkimet.

Sonymen qatar 17 aqpannan bastap Shveıtsarııaǵa keletin adamdarǵa vaktsınatsııa, aýrý nemese koronavırýsqa teris synaq týraly rastaý qujaty qajet emes.

Sonymen birge 31 naýryzǵa deıin qoǵamdyq kólikterde qorǵanys quraldaryn paıdalaný jáne oń COVID-19 synaǵy bar adamdar úshin bes kúndik oqshaýlaý týraly talap kúshine enetini atap ótildi.