Shvetsııanyń ulttyq qaýipsizdik keńesshisi taǵaıyndalǵanyna nebári birneshe saǵat ótkende otstavkaǵa ketti

ASTANA. KAZINFORM —  Shvetsııa jańa ulttyq qaýipsizdik jónindegi keńesshi taǵaıyndaımyn dep úlken daýdyń ortasynda qaldy.

AZƏRTAC agenttiginiń habarlaýynsha, Tobıas Tıýberg bul qyzmetke taǵaıyndalǵannan keıin nebári birneshe saǵat ishinde otstavkaǵa ketken. Sebebi — BAQ tarapynan onyń tanysýǵa arnalǵan Grindr saıtynda buryn jarııalanǵan ıntımdik fotolaryna qatysty suraqtar týyndaǵan. Tıýberg qaýipsizdik tekserisi kezinde óz akkaýnty týraly habarlamaǵanyn moıyndap, qyzmetke kirisýden óz erkimen bas tartqan.

Premer-mınıstr Ýlf Krıstersson bul jaǵdaıdy óte kúrdeli dep baǵalap, júıeli aqaý bolǵanyn moıyndady. Ol mundaı joǵary deńgeıdegi qyzmetke tekseris kezinde mańyzdy aqparatty jasyrýǵa bolmaıtynyn atap ótti.

Bul — bir jyldyń ishinde ulttyq qaýipsizdik keńesshisi qyzmetinen ketken ekinshi jaǵdaı. Buǵan deıin, qańtar aıynda, aldyńǵy keńesshi Henrık Landerholm qupııa aqparatpen abaısyzda jumys isteýge qatysty tergeýdi bastaǵannan keıin otstavkaǵa ketti. 

Oqıǵa oppozıtsııa tarapynan ótkir synǵa ushyrady. Qorǵanys máseleleri jónindegi sotsıal-demokratııalyq partııa ókili Peter Hýltkvıst mundaı qatelikter halyqaralyq arnaıy qyzmetterdiń Shvetsııaǵa degen senimine nuqsan keltiretinin aıtty. Ol osyndaı mańyzdy qyzmetke qatarynan eki ret orynsyz adamdardy taǵaıyndaý Shvetsııa úkimetiniń bedeline úlken soqqy ekenin jetkizdi.

Basqa partııalar da osyǵan uqsas syn aıtty. Jasyldar partııasy bul jaǵdaı úkimettegi qaýipsizdik mádenıetiniń ózi kúmán týdyratynyn jetkizdi. Olardyń pikirinshe, halyqaralyq qaýip-qaterler kúsheıip jatqan tusta, Shvetsııa áldeqaıda jaýapty tásilge laıyq.

Solshyl partııanyń jetekshisi Nýshı Dadgostar: «Biz taǵy da Ýlf Krısterssonnyń qaýipsizdik máselelerine kómektesetin jáne Shvetsııany halyqaralyq qaýipsizdik jelisinde tanystyratyn adamdy tańdaýdaǵy biliksizdigin kórip otyrmyz», — dedi.

Aıta ketý kerek, buǵan deıin Tıýberg táýekel deńgeıi joǵary aımaqtarda qyzmet atqarǵan. 2017–2019 jyldary ol Aýǵanstanda elshi bolǵan. Keıin Ýkraınada elshilik qyzmetin atqarǵan jáne 2023 jylǵa deıin sol jerde jumys istegen. Sońǵy ýaqytta ol Shvetsııa SІM-niń Shyǵys Eýropa jáne Ortalyq Azııa bólimin basqardy.

Eske sala keteıik, buǵan deıin Shvetsııa jastary derbes ómirge daıyn emes ekenin jazǵan edik.