Shvetsııalyq mamandar balalarǵa arnalǵan hosh ıisterdi synǵa aldy

ASTANA. KAZINFORM — Sheteldik kompanııalar sońǵy ýaqytta sábıler men kishkentaı balalarǵa arnalǵan arnaıy hosh ıisterdi jıi shyǵara bastady, dep habarlaıdy AZERTADJ.

Sonyń ishinde Zara jelisi kishkentaılar áleminen shabyt alǵan Le Petit Lullaby atty hosh ıisti tanystyrdy.

Shvetsııanyń astma jáne allergııaǵa qarsy qaýymdastyǵynyń málimetinshe, eń kishkentaı balalarǵa arnalǵan kosmetıkalyq ónimderdiń sany aıtarlyqtaı artqan.

Alaıda sarapshylar mundaı úrdiske alańdaýshylyq bildirip otyr. Qaýymdastyq ókili Lızelott Florenniń aıtýynsha, balalarǵa arnalǵan átirdi qoldaný negizsiz ári qaýipti bolýy múmkin.

Onyń túsindirýinshe, teri men onyń qorǵanysh qabaty belgili bir júktemege ǵana tótep bere alady.

— Ósip kele jatqan aǵza áldeqaıda sezimtal, al sábılerde átir quramyndaǵy zattardyń birine allergııa damý qaýpi joǵary, — dedi Floren.

Mamannyń sózinshe, sábılerdiń terisi óte názik, al hosh ıisti zattardyń áserinen týyndaıtyn janaspaly allergııa ómir boıyna saqtalýy múmkin.

Buǵan qosa, allergendi anyqtaý qıynǵa soǵady, keıin adamǵa shampýnnan bastap krem men kosmetıkaǵa deıingi ónimderdiń quramyn muqııat tekserýge týra keledi.

Inditex kompanııasy (Zara ıesi) balalar ónimderi qatań baqylaýdan ótetinin jáne densaýlyq pen qaýipsizdik basty basymdyq ekenin málimdedi.

Sondaı-aq kompanııa álemniń kóptegen elinde balalar gıgıenasyna arnalǵan jeńil hosh ıisterge suranys bar ekenin atap ótti.

Soǵan qaramastan, mundaı ónimderdiń naryqqa shyǵarylýy mamandar arasynda alańdaýshylyq týǵyzýdy jalǵastyryp otyr.

Osyǵan deıin Italııada úı janýarlaryna arnalǵan átirge ıttiń aty qoıylǵanyn jazǵan bolatynbyz.