Shvetsııada Ozempic preparatynyń kontrabandasy men zańsyz satylymy kúrt ósken

ASTANA. KAZINFORM — Ozempic alǵashynda dıabetke qarsy dári retinde jasalǵan, alaıda keıin tábetti basyp, salmaqty azaıtý qabiletin kórsetti, dep jazdy AZƏRTAC.

Memlekettik farmatsevtıkalyq basqarmanyń málimetinshe, bul qylmystyq iske buryn esirtki men dopıng satqan toptar da aralasa bastaǵan.

Keden qyzmeti qazirdiń ózinde jalǵan preparattyń iri partııalaryn — kapsýlalar men júzdegen qutyny tárkilegen, degenmen bul naryqtyń tek az ǵana bóligi ekeni aıtylyp otyr. Jyl basynan beri 400-den astam ınektsııalyq qalam men ampýla tárkilengen. Norvegııa keden qyzmeti de Shvetsııadan jiberilgen partııalardy ustaǵan.

Jalǵan Ozempic áleýmettik jelilerde, onyń ishinde ınflıýenserler arqyly belsendi jarnamalanýda. Farmatsevtıkalyq basqarma bul preparatty zańsyz satatyn shamamen 20 saıtty anyqtaǵan. Bul saıttardyń artynda aqsha jymqyrýmen de aınalysatyn birneshe uıymdasqan jeliler tur.

Mamandar eskertedi: jalǵan dárilerdiń naqty quramyn eshkim bilmeıdi, sondyqtan densaýlyqqa qaýip zor. Artyq dozalaný saldarynan aýrýhanaǵa túsý jaǵdaılary tirkelgen, sondaı-aq túrli belsendi zattar aralasqan qospalar tabylǵan.

Ozempic satqany úshin bir jylǵa deıin bas bostandyǵynan aıyrý jazasy qarastyrylǵan, alaıda zańnamadaǵy olqylyqtar men resýrstyń shekteýligine baılanysty polıtsııa men keden bul naryqpen tıimdi kúrese almaı otyr. Úkimet farmatsevtıkalyq basqarmaǵa máseleni sheshý joldary boıynsha usynystar daıyndaýdy tapsyrdy — esep kelesi jyldyń qańtarynda kútiledi.

Eske sala keteıik, buǵan deıin Shvetsııada jastar arasynda ishek qaterli isigine shaldyqqandar sany artyp kele jatqanyn jazǵan edik.