Shvetsııada azyq túlik pen janarmaı qymbattap jatyr

ASTANA. KAZINFORM – Aqpanda Shvetsııada et pen balyq baǵasy qymbattady, al jalpy azyq-túlik baǵasynyń ósimi baıaýlady, dep habarlaıdy AZERTADJ.

Shvetsııadaǵy azyq-túlik baǵalary jónindegi eń iri qosymsha Matpriskollen derekterine sáıkes, et baǵasy 1,7%-ǵa ósken. Buǵan negizinen sıyr eti qunynyń qymbattaýy áser etken. Jemis-jıdek 0,8%-ǵa, balyq pen teńiz ónimderi 0,4%-ǵa qymbattady. Al kókónister men sút ónimderi kerisinshe 0,6%-ǵa arzandaǵan. Sońǵy bir jylda azyq-túlik taýarlary jalpy alǵanda 1,1%-ǵa qymbattaǵan.

Sonymen qatar janarmaı naryǵyna qysym kúsheıdi. Demalys kúnderi Taıaý Shyǵystaǵy shabýyldardan keıin Shvetsııada benzın baǵasy lıtrine 16 kronaǵa (shamamen 1,8 dollar) jetti.

Sarapshylardyń baǵalaýynsha, óńirdegi shıelenis saqtalsa, bir aı ishinde baǵa taǵy 10%-ǵa ósýi múmkin.

Buǵan Ormýz buǵazy arqyly keme qatynasynyń toqtaýy sebep bolǵan. Bul strategııalyq baǵyt arqyly táýligine shamamen 20 mıllıon barrel munaı tasymaldanady.

Jumadan beri álemdik munaı baǵasy shamamen 20%-ǵa ósip, barreline 80 dollarǵa jetti.

Eger buǵazdyń jabylýy bir aıǵa sozylsa, munaı baǵasy barreline 100 dollarǵa deıin kóterilýi yqtımal. Bul Shvetsııada benzın baǵasynyń lıtrine shamamen 17,5 kronaǵa (1,9 dollar) deıin qymbattaýyna ákelýi múmkin.

Bılik ókilderi janarmaıdyń naqty jetkizilimi turaqty ekenin málimdedi. Alaıda sarapshylar qaqtyǵystyń odan ári ýshyǵýy baǵanyń qosymsha ósýine jáne úı sharýashylyqtaryna ekonomıkalyq qysymnyń kúsheıýine ákelýi múmkin ekenin eskertedi.