Shvetsııa jatyr moıny obyryn jeńgen alǵashqy el atanýy múmkin

ASTANA. KAZINFORM — Shvetsııada jyl saıyn shamamen 530 áıel jatyr moıny obyryna shaldyǵady. Orta eseppen ár úsh kún saıyn bir áıel osy dertten kóz jumady, dep habarlaıdy AZERTADJ.

Qazirgi tańda Shvetsııa bul qaterli isikti tolyqtaı joıǵan álemdegi alǵashqy el ataný múmkindigine ıe.

Aýrýdyń negizgi sebebi — adam papıllomasy vırýsy (APV). Ol jyl saıyn shamamen 1100 qaterli isik túriniń damýyna sebep bolady, onyń 500-den astamy — jatyr moıny obyry.

Bul aýrýdyń aldyn alý úshin Shvetsııada keń aýqymdy vaktsınatsııa baǵdarlamasy iske qosyldy.

2025 jyldyń 30 maýsymyna deıin 1994–1999 jyldary týǵan áıelder APV-ge qarsy tegin vaktsına ala alady. Qazirgi tańda qajetti 70% kórsetkishtiń 59%-y ǵana qamtylǵan. 30 maýsymnan keıin ekpeniń quny shamamen 6000 shved kronyn (shamamen 550 AQSh dollary) quraıdy.

22 mamyr kúni búkil el boıynsha birqatar kınoteatrlarda vaktsınatsııa júrgiziledi. Ekpe tegin, al saldyrǵandarǵa kınoǵa tegin bılet usynylady.

Bul bastamany Shvetsııanyń barlyq 21 óńiri, Qaterli isikpen kúres qory (Cancerfonden), Capio medıtsınalyq jelisi jáne Filmstaden kınoteatrlar jelisi qoldap otyr.

Keıbir óńirde 2000–2001 jyldary týǵan áıelder de tegin vaktsınatsııa saldyra alady.

Osyǵan deıin Shvetsııada joǵary jumyssyzdyq deńgeıi tirkelgenin jazdyq.