Shvetsııa ıadrolyq shabýylǵa qarsy on myńdaǵan býnkerin kúsheıtpek

ASTANA.KAZINFORM - Shvetsııa azamattyq baspanalaryn qaıta jańarta bastady, dep habarlaıdy BILD.

Eldegi barlyq 64 myń býnker adamdardy ıadrolyq soqqydan qorǵaı alatyndaı kúıge keltirilýi tıis. Bul týraly Shvetsııanyń azamattyq qorǵaý qyzmeti (MSB) habarlady. Jóndeý jumystaryna 100 mıllıon kron bólindi, bul shamamen 9 mıllıon eýrony quraıdy.

MSB málimetinshe, qajet bolǵan jaǵdaıda býnkerler 7 mıllıonǵa jýyq adamǵa qorǵan bola alady (Shvetsııanyń búkil halqy shamamen 10,5 mıllıon adam).

Elde mundaı baspanalardyń eki túri bar: turǵyn úılerge salynǵan baspanalar jáne jartastarǵa qashalǵan nemese erekshe berik betonnan salynǵan «fellbýnkerler». Olar jarylys tolqyndary men synyqtardan ǵana emes, radıatsııalyq, hımııalyq nemese bıologııalyq qarýlardan da qorǵaıdy.

Modernızatsııa jobasy Shvetsııada qabyldanǵan «jalpy qorǵanys» strategııasyna sáıkes keledi, soǵys bolǵan jaǵdaıda árbir azamat óz rólin bilýi jáne áreket etýge daıyn bolýy kerek. Qazirdiń ózinde 25 úlken býnkerde jóndeý jumystary bastalyp ketti.

Shvetsııa premer-mınıstri Ýlf Krıstersson el 2030 jylǵa qaraı áskerı shyǵyndardy ishki jalpy ónimniń 2,4%-ynan 3,5%-yna deıin arttyratynyn aıtty. Ol muny «qyrǵı-qabaq soǵystan keıingi eń úlken qorǵanys kesheni» dep atady. 2023 jyly Shvetsııa beıtaraptyqtan bas tartyp, NATO-ǵa kirdi.

Osyǵan deıin Shvetsııa ulttyq qaýipsizdikke qater tóndiretin adamdardy azamattyǵynan aıyratynyn habarlady.