Shvetsııa úkimeti eńbekaqy salyǵyn azaıtýǵa nıetti

ASTANA. KAZINFORM — Shvetsııanyń Vesteros qalasynda ótken «Ýmerennye» partııasynyń sezinde eldiń qarjy mınıstri Elızabet Svantesson Shvetsııadaǵy eńbek salyǵy áli de tym joǵary ekenin jáne ony odan ári tómendetý qajet ekenin aıtty, dep habarlaıdy AZERTAC.

Onyń aıtýynsha, úkimet tabys salyǵy júıesin jeńildetip, eńbek etýdi, oqýdy jáne kásipkerlikti neǵurlym tıimdi etýge nıetti.

Usynylǵan ekonomıkalyq baǵdarlama qazirgi júıeniń ornyna eńbekaqyǵa salynatyn salyqty esepteýdiń jańa qaǵıdatyn engizýdi, sondaı-aq memlekettik tabys salyǵyn tóleıtin azamattar sanyn qysqartýdy kózdeıdi.

Qarjy naryǵy mınıstri Nıklas Vıkman bul reformany 1990 jyldardan bergi eń aýqymdy ózgeris dep atap, ol salyq júıesin qarapaıym ári ádilettirek etetinin aıtty.

Úkimet buǵan deıin ondaǵan mıllıard shved kronasyna salyqty azaıtqan, alaıda Elızabet Svantessonnyń aıtýynsha, bul jetkiliksiz.

— Shekti salyq mólsherlemeleri áli de 50 paıyzdan asady, bul ádiletsiz, — dedi Elızabet Svantesson.

Mınıstr sondaı-aq memleket qajettilikten artyq salyq jınamaýy tıis ekenin atap ótti jáne shved ekonomıkasynyń básekege qabilettiligin arttyrý úshin korporatıvtik salyqty da qosymsha tómendetýge nıetti ekenin aıtty.

Aıta ketelik 2026 jyly dıvıdend alatyn jeke tulǵalar salyq jeńildiginen aıyrylady.