Shvetsııa elshisi Qazaqstandy kólikpen saıahattady
AQTAÝ. KAZINFORM — Shvetsııanyń Qazaqstandaǵy elshisi Eva Pýlano el aýmaǵyn kólikpen aralap shyqqan. Ol joldasymen birge saıahattap júr.
Olar sapardy 20 maýsym kúni Astanadan bastap, Aqmola, Qostanaı, Aqtóbe oblystarynyń ústinen ótken. Odan soń Jylyoı aýdanyndaǵy Qulsary qalasyna bardy. Sapardyń Qazaqstan aýmaǵyndaǵy bóligi Mańǵystaý oblysynda támamdalǵan. Saıahatshylar odan ári, Baký arqyly Eýropanyń 7-8 memleketin aralap, Shvetsııaǵa deıin barýdy josparlaıdy.
Dıplomat mundaı saıahat arqyly óńirlermen jaqynyraq tanysyp, eldiń mádenıeti men turmysyn tereńirek túsinýdi maqsat etken.
— Quryqtan attanatyn paromdy kútken kezde, Aqtaýdy aralap úlgerdik. Bir sáttiń áserin sıpattap kóreıin. Jaǵajaıdaǵy meıramhanadan Kaspııdi tamashaladyq. Aınalamyz baqytty adamdarǵa toly boldy. Dastarhanda dámi til úıiretin jergilikti dám. Kúnniń batqanyna osylaı qarap turý san túrli sezimderge boı aldyryp, umytylmas kesh bolyp este qaldy, — deıdi Shvetsııanyń Qazaqstandaǵy elshisi Eva Pýlano.
Shvetsııa elshisine eldi mekenderdi kólikpen aralaǵan unaǵan. Ol saıahattan erekshe áser alǵanyn aıtady.
— Eldi mekender arasynda úıir-úıir jylqy, sıyr men túıeni kórip, erekshe áserde boldym. Bul men úshin ekzotıka. Osy saparǵa uıytqy bolǵan kúıeýime alǵys aıtamyn. Astanadan Stokgolmǵa kólikpen qaıtý onyń ıdeıasy bolǵan. Qazaqstandy endi tek tabıǵaty ádemi memleket qana emes, taǵylymy mol meken dep aıta alamyn. Sondyqtan shved azamattary men ótken sapardy ózderi jasap, kózben kórse eken deımin, — deıdi elshi.
Buǵan deıin, Aqtaýda 11 eldiń sheberi qoıdyń júninen tekemet basyp shyǵarǵany týraly jazǵan bolatynbyz.