Shvetsııa elektromobılderdi qozǵalys kezinde qýattaýǵa bolatyn joldar salady

ASTANA. KAZINFORM — Shvetsııada, 2045 jylǵa qaraı, uzyndyǵy úsh myń shaqyrymdy quraıtyn álemdegi alǵashqy elektromobıl joly paıda bolady, dep habarlaıdy Euronews. 

Mundaı jolda elektromobılderdi qozǵalys kezinde zarıadtaýǵa bolady.

Ótken aıda Eýropalyq Odaq 2035 jyldan bastap satylǵan barlyq jańa kólikterdiń shyǵaryndylary nóldik bolýyn talap etetin zań qabyldady. Eýropa elderi qazba otynsyz kólikterge qajetti ınfraqurylymdy daıyndaýǵa kirisip jatyr.

Shvetsııa óziniń magıstraldarynyń birin álemde birinshi bolyp elektromobıl jolyna aınaldyrýda. Mundaı jolda jeńil jáne júk kólikteri qozǵalys kezinde qýat alady.
Sarapshylar mundaı dınamıkalyq zarıadtaý kishirek batareıalarmen uzaǵyraq jumys isteýge múmkindik beredi jáne júrgizýshilerdi zarıadtaý stantsııalarynda ýaqyt joǵaltýdan saqtaıdy dep túsindiredi.

Shvetsııa elektrlendirilgen joldar salasynda alǵashqy boldy, qazirdiń ózinde birneshe pılottyq jobalardy, sonyń ishinde álemdegi alǵashqy ýaqytsha elektrlik joldy iske qosty.
Joba 2025 jylǵa deıin aıaqtalady dep josparlanýda. Kólikti zarıadtaý túri áli anyqtalǵan joq. Búgingi kúni olardyń úsh túri bar: kontaktili júıe, ındýktıvti jáne kondýktıvti júıe.

Kontakt tek aýyr kólikter úshin ǵana qoldanylýy múmkin. Bul júıe avtobýstyń nemese tramvaıdyń belgili bir túrin elektrmen qamtamasyz etý úshin áýe symdaryn paıdalanady.
Kondýktıvti júıe smartfondarǵa arnalǵan zarıadtaý alańy sııaqty jumys isteıdi. Bul jaǵdaıda elektromobıl arnaıy aımaqqa kirgen kezde symsyz zarıadtalady.

Indýktıvti júıede joldyń astynda ornalasqan arnaıy jabdyq qoldanylady. Elektromobılder mys katýshkasynan jáne basqarý modýlinen qýat alady.

Eske sala keteıik, Shvetsııa ıadrolyq shabýylǵa qarsy on myńdaǵan býnkerin kúsheıtpek.